Nog ’n voertuig bars deur aftreeoord se heining
In net minder as 'n jaar is nog 'n voertuig deur die palissadeheining van Helen Bellinganhof aftreeoord vir ouer persone in Condorstraat. Die botsing het Saterdagmiddag omstreeks 13:00 plaasgevind toe 'n blou Volkswagen Polo die pad byster geraak het en deur die heining gebars het. Volgens omstanders het die motor met St. Saviourstraat uit die rigting van die gholfbaan gery. Die bestuurder wou regs in Condostraat indraai, maar het skynbaar te vinnig gery en beheer verloor waarna die motor die heining getref het. Hy was alleen in die motor en is op die toneel vir 'n armbesering behandel waarna hy per ambulans hospitaal toe geneem is. Sover vasgestel kon word, was daar nie ander voertuie wat moontlik tot die botsing kon bydra nie. Die erg-beskadigde Polo is met kabels deur 'n insleepvoertuig uit die tuin gesleep.
Hierdie botsing volg byna presies 'n jaar na 'n vorige botsing op dieselfde plek. Sondagoggend 12 Mei 2019 het twee voertuie omstreeks 02:30 op dieselfde plek deur die heining gebars. 'n Nissan Micra, ook 'n bloue, en 'n Nissan bakkie was by die kruising in 'n botsing betrokke waarna die Micra min of meer op dieselfde plek as die Polo, op sy dak te lande gekom het. Die Nissan-bakkie het ook 'n deel van die palissade en 'n betonpilaar verwoes en aan die brand geslaan. Die bestuurder van die Micra en sy passasier is beseer, maar die twee insittendes van die bakkie het die toneel verlaat voordat die polisie opgedaag het.