Motors verkoop, maar nie sonder frustrasie
As deel van vlak 4 se inperkingstoegewings mag motorhandelaars transaksies beklink mits daar aan spesifieke voorwaardes voldoen word.
Volgens verskeie motorhandelaars met wie Oudtshoorn Courant gesels het, is die feit dat lisensiekantore en voertuigtoetsstasies nog nie oop is nie egter 'n groot struikelblok.
'n Verkoopsman van gebruikte voertuie moet allerhande planne beraam. "In die eerste plek kan ek nie 'n kar padwaardig laat verklaar nie, want die toetsstasie is toe. In die tweede plek kan die koper nie die motor op sy naam registreer nie, want die lisensiekantore is toe en die eNatis-registrasiestelsel is ontoeganklik."
Hy verduidelik dat motors wat die afgelope 60 dae 'n padwaardigheidstoets geslaag het, wel verkoop kan word, maar nie geregistreer kan word nie. "Die beplanning maak vir my geen sin nie. Hoe kan 'n bedryf oopgestel word, maar 'n kardinale deel van daardie bedryf is nog gesluit?"
Finansiering hangende
Volgens 'n handelaar van nuwe voertuie word die verkoop van voertuie geweldig beperk deur die regulasies. "Ek kan byvoorbeeld 'n splinternuwe bakkie verkoop, maar sonder registrasie sal die bank nie die finansiering afhandel nie. Ons word ook nie toegelaat om bybehore te voorsien nie. Ons kan dus nie die aankoop afhandel as die koper bybehore soos ’n rolstaaf, kappie en bosbreker wil laat aansit nie."
Voertuie verkoop tog
'n Ander handelaar stem saam dat die lisensiekantore wat gesluit is 'n frustrasie is, maar volgens hom het hulle die afgelope week reeds sewe nuwe voertuie verkoop. "Ons gesels maar met ons klante en verduidelik dat hulle die voertuig kan koop, maar dat dit vir eers hier moet bly of by sy huis moet staan. Maar ons is oop vir besigheid. Sedert die begin van die inperking het ons in die omgewing van R3 miljoen se besigheid net by Oudtshoorn se tak verloor."
Streng toegangsmaatreëls word by handelaars toegepas om die aantal klante te beperk en verkoopte voertuie moet aan die klant gelewer word.
Maak reg vir Junie
Ntobeko Mangqwengqwe, kommunikasiebeampte van die Oudtshoorn-munisipaliteit, sê die lisensiëring van voertuie en alle verwante transaksies is 'n provinsiale funksie wat deur munisipaliteite bestuur word.
Volgens 'n mediaverklaring deur die George-munisipaliteit het hulle ook reeds begin om hulle lisensieafdeling vir heropening voor te berei deur die perseel te ontsmet en alle voorgeskrewe Covid-19-regulasies in plek te kry.
‘n Positiewe vooruitsig vir motorhandelaars is dat die minister van vervoer, Fikile Mbalula, Dinsdag gesê het dat lisensiekantore, toetsstasies en bestuurskole vanaf 1 Junie dienste kan lewer. Hy het gesê dat streng maatreëls ten opsigte van sosiale distansiëring en ontsmetting toegepas moet word. Meer inligting is beskikbaar by www.westerncape. gov.za/service/vehicle-registration.