Restaurante beur moedig voort
Inperkingsmaatreëls wat gedeeltelik opgehef word, lyk op papier dalk goed, maar in die praktyk blyk dit nie so rooskleurig te wees nie. Dit is die geval met die verslapping van die reëls wat eetplekke nou toelaat om sake te doen, mits hulle die kos by die kliënt aflewer.
Volgens die eienaar van 'n groot gesinsrestaurant op die dorp is sy enigste voordeel tans dat sy restaurant se naam ten minste weer aktief is. "Maar om kos af te lewer is nie restaurante se hooffunksie nie. Ons is nie soos wegneemete-plekke ingerig nie, veral nie vir aflewerings nie. Om 'n hele ete af te lewer is heeltemal anders as om byvoorbeeld 'n pakkie hoender of 'n pizza af te lewer."
Volgens hom sit hy met 'n reusekragrekening van meer as R30 000 vir die byna twee maande wat hy gesluit was. "Ek het twee yskaste gehad wat geloop het, die grootste deel van die rekening is die basiese kragheffing wat nie gestaak is terwyl ons gesluit was nie."
Behalwe vir die feit dat sy omset vir etes wat afgelewer word. skaars 20% van normale omset is, sit ongeveer 30 van sy werknemers ook by die huis. "Tans het ons twee kombuispersoneel en 'n bestuurder, waar ons normaalweg meer as 30 werknemers het."
By ondernemings wat wegneemetes verkoop lyk die prentjie effens beter, maar daar is ook groot uitdagings. Die eienaar van een van die gewilde wegneemeteondernemings sê hulle grootste uitdaging is dat mense hulle onder bestellings toegooi tussen 17:00 en 18:00 en dan ongeduldig raak as die kos nie vinnig afgelewer word nie.
"Klante moet in gedagte hou dat ons volgens wetgewing slegs 30% van ons personeel mag gebruik en dat ons om 19:00 moet sluit, en dan kry ons 100 bestellings binne 'n uur."
Hy sê onder normale omstandighede is hulle besigheid deur die dag versprei met ’n toename saans en hulle besigste tyd oor naweke. "Nou gaan daar deur die dag niks aan nie en soos Vrydagaand kry ons bestellings vir 400 items in minder as 'n uur, en ons kan dit eenvoudig nie bybring nie wat beteken dat ons omset baie laer is as onder normale omstandighede. "Ons is geweldig dankbaar vir mense se ondersteuning, ons vra net dat hulle wegneemeteplekke moet help deur hulle bestellings te versprei en geduldig te wees."
Dan blyk dit ook dat die verkryging van meel sommige eetplekke nadelig beïnvloed. "Daar is 'n groot agterstand met die produksie van meel, wat beteken dat ons soms uit voorraad hardloop," het 'n sakeman gesê.
Nog 'n restauranteienaar wat al etlike jare haar restaurant bedryf sê sy is dankbaar dat hulle nou tot 'n mate kan sake doen. "Daar is baie uitdagings en die eerste week het ons gesukkel, maar nou het ons ons voete gevind en lewer elke dag tussen eenuur en tweeuur en weer tussen vyfuur en sesuur etes af." Sy sê die voordeel is dat sy nou weer kan begin om haar kostes te dek en vir vier mense weer werk kan gee. "Gelukkig verskaf ons reeds vir 'n lang tyd spyseniering vir funksies, so my kombuis by die huis is ten volle ingerig om te gebruik en ons hoef nie die restaurant te gaan oopsluit nie."
Sy stem saam met ander sakemanse dat die tyd van inperking wat gebruik was om voor te berei vir die aanslag van die virus nou lank genoeg was en dat besighede ten volle moet oopmaak.
Dit is op hierdie stadium onduidelik op watter vlak eetplekke weer toegelaat gaan word om klante op die perseel te bedien.