Mev. Heelal-finalis skenk klere aan traumakamer
Bennedette Landman, 'n finalis vir Mev. Heelal, het Maandagoggend klere aan die polisie se eenheid teen gesinsgeweld geskenk.
Landman, 'n Oudtshoorniet wat tans op Laingsburg woon, sê mishandeling teen vroue en kinders is vir 'n haar 'n teer saak en sy probeer om vroue en kinders wat hierdeur geraak word by te staan.
"Ek is self fisies en emosioneel mishandel. Ek wil hê mense moet weet ek verstaan regtig waardeur hulle gaan. Dit is nie maklik om ander mense in die oë te kyk en te sê ek was mishandel nie, so ek verstaan hoe dit voel wanneer jy met wildvreemde mense daaroor moet praat. Ek weet hoe dit voel om bang te wees en in die aand ander slaapplek moet soek voor jy skool toe gaan."
Landman sê enigiemand kan iemand help wat deur mishandeling geraak word.
"Jy hoef nie berading te kan doen nie, skenkings help ook. Daar is geweldig baie vroue wat in die middel van die nag van hulle huise wegloop met net die klere aan hul lywe omdat hulle bang is. Plekke soos die eenheid teen gesinsgeweld by die polisie help sulke mense en skenkings word aan mense wat dit nodig het oorhandig. Moet ook nie stilbly oor mishandeling as jy weet van iemand wat mishandel word nie. Meld dit aan."
Landman werk gereeld op Laingsburg met vroue en veral kinders wat mishandel word.
"Sedert die inperking begin het ontvang ek al meer oproepe om hulp. Daar word soms babas ingebring wat dae laas gebad is en soms is die fisiese mishandeling duidelik. Dit is absoluut hartverskeurend, maar ek weet dit is die pad wat die Here wou hê ek moes volg.
“As ek nie as kind deur dit gegaan het nie, sou ek nie ander mense wat daardeur gaan, kon help nie."