2 Vroue durf koue aan
Kathy Bezuidenhout, voorsitter van Steynsburggemeenskapsforum, het in samewerking met die Boerevereniging op Steynsburg besluit dat 'n optog deur die dorp die afgelope Saterdag gehou sou word. Sy het ook die gemeenskappe rondom Steynsburg, te wete Conway,
Teebus, Hofmeyr, Molteno, Venterstad en Burgersdorp genooi om deel te neem aan die Move a Million- optog. Die hoofdoel van die optog was die wêreldwye bewusmaking van plaasmoorde en swak dienslewering in die Noordoos-Kaapse platteland. "As dit net aan een plaasboer en sy gesin se veiligheid 'n verskil sal maak, was hierdie die moeite werd," het Bezuidenhout na afloop van die veldtog gesê.
Die weersomstandighede het egter geensins saamgespeel nie en teen die tyd dat die verrigtinge moes begin, was slegs sy en Sylvia Buys, ook 'n plaaslike inwoner, teenwoordig. "My eie kinders woon op 'n plaas en hul veiligheid is vir my prioriteit." Buys het in Steynsburg kom aftree na haar eggenoot se skielike heengaan. Hierdie twee dapper vroue het die ysige koue en nattigheid aangedurf en het elkeen hul pos, vroualleen, vanaf 09:00 tot 13:00 beman om die publiek, boere en inwoners wat in die dorp was, bewus te maak van dit waarvoor hul staan.