Lategansvlei stadion 9 jaar oud
Die o.15-sokkerspanne van Zeekoegat en Lategansvlei het die naweek op Lategansvlei mekaar die stryd aangesê. Hierdie vriendskaplike wedstryd is gespeel ter viering van die negende bestaansjaar van die Lategansvleistadion. Geen toeskouers is gedurende die wedstryd toegelaat nie en alle Covid-19-regulasies is gehandhaaf.
Volgens die projekbestuurder, Darion Urbanski, is die idee om 'n stadion op Lategansvlei te bou, gebore tydens die sokkerwêreldbekertoernooi wat in 2010 in Suid-Afrika plaasgevind het.
"Tesame met sokkerliefhebbers uit Duitsland en die ondersteuning van Julia le Roux (huidige speaker) kon ons hierdie visie om 'n jeugsokkerprojek (Alte Försterei 2) moontlik maak. Sedertdien word daar gereeld sokkerwedstryde gespeel. Die stadion word ook as venue vir Lategansvlei se inryteater, plaaslike feeste en konserte aangewend."
Urbanski sê die doel van die stadion is om talent te bevorder en om ook spangees te ontwikkel. "Danksy die bydrae van borge kon ons 'n pragtige sokkerveld uit 'n woestynveld ontwikkel.
Nou na nege jaar is dit vir my 'n riem onder die hart om oor die jare te kon sien hoe die jongmense hul talente by die stadion kon slyp."
Volgens Urbanski word daar beoog om in die toekoms ook 'n verhoogsaal te bou wat dit moontlik sal maak vir die jeug om hul sang, dans en toneelspeltalente ten volle te kan uitleef.