Crocs and Warriors-eindstryd uitgestel
Die plaaslike OPL-vlakkiekrieket eindstryd is na die onlangse vlak 4-aankondiging van pres. Cyril Ramaphosa tot verdere kennisgewing uitgestel.
Vanjaar se opwindende vlakkiekriekettoernooi het 16 spanne van verskillende woonbuurte ingesluit met slegs vier spanne (Neppon Warriors, Old Crocs, Lions en Firestones) wat die halfeindstryd gehaal het. Die Crocs het in hul wedstryd die Lions in ‘n naelbytwedstryd geklop, terwyl die onoorwonne Neppon Warriors die viermalige OPL-kampioen, Firestones, gewen het.
Ongemagtigde sportbyeenkomste
Die Oudtshoorn-munisipaliteit het in ‘n sterk bewoorde verklaring gewaarsku dat ongemagtigde sportbyeenkomste nie geduld sal word nie.
“Die plaaslike veiligheids- en sekuriteitsgroep sal streng maatreëls tref teen oortreders van onwettige gebeure en ongemagtigde sportaktiwiteite na aanleiding van die aankondiging van president Cyril Ramaphosa van waarskuwingsvlak 4-regulasies op Sondag 27 Junie.
‘n Vergadering tussen Oudtshoornmunisipaliteit se rampbestuur, die SuidAfrikaanse polisiediens (SAPD) en die munisipale wetstoepassing het besluit om ‘n houding van geen verdraagsaamheid teenoor die onwettige aanbieding van geleenthede en sport in die Groter Oudtshoorn in te neem. Dit volg op berigte oor ongemagtigde en onwettige sportbyeenkomste wat onlangs in dele van die Groter Oudtshoorn gespeel was. Geen sport byeenkomste sal vir die volgende twee weke goedgekeur word nie, soos aangedui in die waarskuwingsvlak 4 Covid-19-regulasies,” het Adel Supra-Vertue, die hoof van brandweer-, reddings- en rampbestuursdienste van die Oudtshoornmunisipaliteit.
Alhoewel die regulasies wel professionele en nie-professionele sportwedstryde toelaat wat deur erkende sportliggame aangebied word, is die regulasies duidelik dat sulke liggame die Covid-19-protokolle streng moet nakom,” het Supra-Vertue bygevoeg.
Daar moet aansoek gedoen word vir alle sportbyeenkomste by SAPS / Rampbestuur en die provinsiale departement van gesondheid. Geen sportbyeenkoms kan voortgaan sonder die finale goedkeuring van die departement van gesondheid en die SAPD nie.
“Ons sal sportbyeenkomste in die Groter Oudtshoorn deeglik monitor om vas te stel of sulke sportbyeenkomste deur die relevante strukture goedgekeur is en dat dit binne die bestek van die regulasies funksioneer.
Enige sportaktiwiteit wat sonder die nodige goedkeuring voortgaan, word as onwettig beskou en word hanteer in ooreenstemming met die gebeure en die regulasies. Aansoeke vir sportbyeenkomste wat op kort kennisgewing ingedien word, kan nie goedgekeur word nie, aangesien die toestemming van SAPS en die departement van gesondheid tyd neem. ”
Enige persoon wat die Covid-19-regulasies oortree, is skuldig aan ‘n misdryf en, by skuldigbevinding, is sodanige persoon strafbaar met ‘n boete of tot gevangenisstraf vir tot ‘n tydperk van tot ses maande of vir beide sodanige boete en gevangenisstraf.