Nieu-Bethesda-sportterrein erg verwaarloos
Die sportterrein in Nieu-Bethesda is vinnig besig om ten gronde te gaan en dit lyk nie of dit die Dr Beyers Naude-munisipaliteit in die minste pla nie.
DA-raadslid vir wyk 2, Ricardo Smith, het sy kommer uitgespreek oor die verskriklike toestand van die sportterrein in NieuBethesda.
Volgens hom is daar niks van die veld oor nie, die gras is heeltemal dood en die kleedkamers word al meer beskadig. Hy is van mening dat die sportterrein so agteruitgegaan het omdat die Dr Beyers Naude-munisipaliteit (DBNLM) sy plig versuim om die sportterrein te onderhou.
Smith beweer dat hy hierdie kwessie al by verskeie geleenthede onder die DBNLM se direkteur van gemeenskapsdienste, Gewnynne Hermanus, se aandag gebring het, maar dat hy nog geen terugvoer ontvang het nie. Die betrokke direkteur het glo ongeveer twee maande ná sy aanstelling al onderneem om met die sportleiers in NieuBethesda te ontmoet en na hulle voorstelle te luister, maar hierdie vergadering het nooit plaasgevind nie.
Smith sê dat die jeug in Nieu-Bethesda aangebied het om die sportveld nat te maak en die kleedkamers in stand te hou, maar die direkteur slaan glo nie ag op kommunikasie in hierdie verband nie en versuim om toestemming hiervoor te gee.
“Nieu-Bethesda is ‘n arm gemeenskap en die werkloosheidsyfer is baie hoog. Sport is basies al wat hierdie gemeenskap het om hulle mee besig te hou en dit is hartseer om te sien hoe iets wat vir ‘n gemeenskap so baie beteken voor jou oë tot niet gaan.”
Smith bevestig dat hy intussen met die departement van sport en ontspanning in verbinding getree het in ‘n poging om fondse te bekom om die sportterrein in NieuBethesda op te knap.
Smith spreek verder sy kommer uit oor die haglike toestand van die provinsiale en munisipale paaie in Nieu- Bethesda. Hy beweer dat hy dit al maande gelede onder die aandag van die DBNLM se direkteur van infrastruktuur dienste, Bennie Arends, gebring het, maar dat daar aanhoudend verskoning gemaak word dat die munisipaliteit nie geld het om die padskraper vanaf Graaff-Reinet na NieuBethesda te vervoer nie. Hierdie paaie is glo vir die afgelope twee jaar nog nooit geskraap nie en het gevolglik só agteruitgegaan dat dit bykans onbruikbaar is. Een van die grootste bekommernisse is dat die ambulans wat pasiënte vanaf Nieu-Bethesda na GraaffReinet moet vervoer ook van hierdie pad gebruik moet maak. Afgesien daarvan dat die pad baie gevaarlik is, moet pasiënte letterlik skud-skud die dorp verlaat om by die Midland-hospitaal uit te kom.
Smith sê dat die departement van paaie en vervoer tydens ‘n IDP Representative Forum-vergadering bevestig het dat hulle gedurende Junie/Julie 2021 die ongeteerde stuk provinsiale pad van ongeveer 20 kilometer gaan teer, maar voeg by dat hierdie proses heel waarskynlik deur die nasionale inperking vertraag gaan word.