Cradock-begraafplaas weer aan die brand
CRADOCK - “Die oorgroeide onkruid wat die plaaslike begraafplaas oorneem, is elke jaar die voedingsbron van brande,” vertel Hugo Barendse, ‘n plaaslike inwoner. Nou het die begraafplaas weer gebrand.
Barendse en Ivan Stock van ‘n plaaslike sekuriteitsfirma het eerste op die brand gereageer.
“Die begraafplaas het die afgelope naweek weer vlamgevat en die vermoede is dat kinders wat daar woon moontlik hitte gesoek en van die bosse aan die brand gesteek het.”
Die sterk wind wat Sondagnag begin waai het, het sake net vererger en dit het heelwat mannekrag en goeie samewerking geverg om die brande onder beheer te kry.
Cradock-begraafplaas het al bekendheid verwerf.
Heelwat tonele in die eerste reeks van Spoorloos, wat nou ‘n opvolg op kykNET het, is daar verfilm. Die begraafplaas lê reg langs die Visrivier, wat op die grens verbyvloei.
Talle grafte is in die 1974-vloed beskadig en redelik onlangs was daar ook beriggewing rondom beskadigde grafstene.
Daar is ook reusebome op die deel van die terrein wat teen Dearylaan grens. Hierdie bome is reeds geplant toe die begraafplaas aangelê is en sommige kan selfs tot 150 jaar oud wees.
“Die brande in die verwaarloosde begraafplaas het egter ook van hierdie ou boomreuse laat vlamvat en ná die vlamme geblus is, het die bome steeds gesmeul en stuk-stuk op grafte ineengestort. Dit is vir die gesinne van geliefdes wat hier ter ruste gelê is, ‘n bitter pil om te sluk,” sê Barendse.