Burgemeester steun versoek van landbou
OUDTSHOORN - Chris Macpherson, uitvoerende burgemeester, het bevestig dat die munisipaliteit die versoek van boere in die distrik steun om die gebied tot droogterampgebied te verklaar. Dit volg nadat boere van die streek ‘n week gelede die burgemeesters van Oudtshoorn, George en Kannaland se hulp gevra het om die streek as droogterampgebied te laat verklaar. Die gebied strek vanaf die Bo-Kamanassie-area tot en met Calitzdorp. Die versoekskrifte, wat ook deur die Oudtshoornbesigheidskamer en verskeie landbouorganisasies ondersteun word, is voorverlede Vrydag aan Macpherson, en die burgemeesters van George, Leon van Wyk en Kannaland, Magdaleen Barry gestuur.
Macpherson het Vrydag 9 Julie in ‘n mediaverklaring gesê die munisipaliteit ondersteun die versoek heelhartig. Volgens hom het die proses om deur die verskillende kanale aansoek te doen om tot droogterampgebied verklaar te word, reeds begin. Hy noem dat sommige gedeeltes rondom Oudtshoorn reeds vir 10 jaar onder erge droogte gebuk gaan en dat die meeste boere in die omgewing reeds vir sewe jaar ernstige droogte ervaar. Macpherson het ook reeds met Memory Booysen, burgemeester van Garden Route-distriksmunisipaliteit en met Van Wyk beraadslaag oor wedersydse samewerking om die aansoek te rig en te motiveer.
Volgens die boere wat die versoek gerig het, strek dit wyer as bloot korttermyn droogtehulp, daar word ook gekyk na langtermynoplossings om watersekuriteit aan die Klein-Karoo te bied.
Die watervlak van die Stompdriftdam is tans op 7% en die Kamanassiedam is heeltemal leeg.
Volgens Gerhard Meyer, bestuurslid van die Stompdrift Kamanassie Watergebruikersvereniging (SKWGV), is dit die laagste damvlakke in die honderdjaar-bestaan van die SKWGV. Tot dusver is winterreënval in die streek ook ondergemiddeld met die gevolg dat daar tans geen opvolg-leibeurt is vir boere wat reeds gesaai het en wat op winterreën wag nie.
Laubscher Coetzee, Agri Klein Karoo (AKK) se verteenwoordiger by Agri Wes-Kaap, sê die droogte het die landbou-bedryf in ’n wurggreep. Die droogte word as die ergste in dekades bestempel, deur party selfs as die ergste die afgelope eeu.
Volgens Coetzee het die droogte die boere op hulle knieë.
“Om tot rampgebied verklaar te word, beteken dat ons gebied vir droogtehulp in aanmerking kom. Ons wil graag ook die boodskap tuisbring dat ons nie droogtehulp wil sien as slegs finansiële bydraes van die regering aan boere nie, maar dat daar ook holisties na droogtehulp gekyk moet word. Daarmee word bedoel dat daar ernstig klem gelê moet word op oplossings betreffende watervoorsiening, opgaarkapasiteit en meer effektiewe waterverspreiding deur middel van pypleidings in die skema.”