Kansa beplan kospakkies

Kansa Oudtshoorn wil kospakkies vir Mandeladag op 18 Julie bymekaarmaak en aan die kankerpasiënte waarna hulle omsien, oorhandig.

Adri Odendaal, volhoubaarheids- en dienskoördineerder, sê hulle tema die jaar is ‘One hand can feed another’ en baat nie net die pasiënte by die kospakkies nie, maar ook die hele huisgesin wat saam met die pasiënte die pad stap.

“Ons wil graag gesonde, nie-bederfbare kos bymekaarmaak om aan die mense te oorhandig. Ons vra die gemeenskap se hulp om produkte bymekaar te maak wat ons kan skenk.”

Produkte soos langlewemelk, sojamaalvleis, mieliemeel, rys, pasta, rooibostee, hawermout, grondboontjiebotter, suiker, sout, lensies, sardyne (pilchards), rosyntjies, Weetbix, olie, vlapoeier en jellie sal in die kospakkies gesit word.

Kansa maak ook die Jar of Hope-bottels. “Die Jar of Hope is ‘n glas koffiebottel waarin daar ‘n halwe koppie rys, ‘n halwe koppie sopmengsel, ‘n halwe koppie lensies, een oopgemaakte blokkie aftreksel en ‘n pakkie soppoeier gegooi word. Jy kook dan 2½ liter water en gooi die bestanddele daarin. Só ‘n bottel kan vier mense voed.”

Diegene wat produkte wil skenk kan dit by die Kansa-kantore, Langhovenweg 202 afgee.

Streng Covid-19-regulasies geld en alle pakkies sal gesaniteer word. Skenkers word ook gevra om hul maskers te dra en sosiale afstand te hou. Mense wat nie skenkings self kan aflewer nie kan Odendaal by 072 133 0444 skakel.