Malgas-familie onthul grafsteen
JANSENVILLE - Die Malgas-familie van Jansenville het op 26 Junie die geskiedenis herskryf met die tradisionele grafsteenonthulling van wyle Chrisjan (Daddy) en Katrina (Moeder) Malgas.
Dié oeroue !Nau-ritueel is tydens hierdie onthulling uitgeoefen.
Die !Nau-ritueel is ‘n geestelike waardesisteem wat die inheemse Khoekhoena-volk sedert 1996 besig is om te herstel. Die elemente wat gebruik word tydens die seremonie simboliseer verskillende aspekte van hierdie kulturele en geestelike tradisie. Bitter aalwyn en soet heuning simboliseer die lewensgang van die mens – die positiewe en die negatiewe wat ons ervaar op ons lewensreis.
Water simboliseer die reinigingsproses en Hottentotskooigoed (helichrysum petiolare) word deur die priester in ‘n koedoehoring gebrand om die offerplek te reinig voordat die brandoffer op die altaar geoffer word.
Die grafsteen word uitpak met klippe wat die herverbintenis van die gestorwene met Moeder Natuur, en die terugkeer van die mens na die aarde waaruit hy gevorm is, simboliseer. Daardeur keer die mens terug na sy oorspronklike status en word sy siel met God, sy maker, verenig.
Bruto Malgas verduidelik: “Ons aanbid nie ons voorvaders nie, ons vereer hulle vir dit wat hulle vir ons kon doen, maar die grootste eer kom aan God, ons Skepper, toe vir dit wat ons voorvaders deur Sy almag kon verwesenlik op aarde.”
Die begrafnisondernemer, Rhona Koetaan, bevestig dat dit die heel eerste keer was dat hierdie tipe tradisionele seremonie op Jansenville plaasgevind het en sê dat dit voorreg was om daarby betrokke te kon wees.