Superfiks Jullies inspireer talle
Tarren Jullies, ‘n ma van twee kinders en onderwyseres verbonde aan Colridge Primêr, het tydens verlede week se 62ste virtuele parkrun vir die soveelste keer (12 om presies te wees) die vinnigste tyd oor dié 5 km-wedren behaal. Haar tyd van 24 minute en 43 sekondes is volgens haar nie haar vinnigste oor die afstand nie, maar reflekteer haar pogings om konstant onder 25 minute te eindig.
‘n Beskeie Jullies sê dat sy vier jaar gelede nie in haar wildste drome sou kon droom dat sy in staat sou wees om fisies te draf nie, wat nog te sê vinnige tye behaal.
“In 2017 het ek eendag ‘n foto van myself gesien wat my so geskok het dat ek vir myself gesê het: “Here, nou wil ek nie meer so lyk nie.”
Met my groot lyf, wat toe 97 kg weeg het, het ek eers elke dag begin stap om net ‘n paar kilo’s in my bene te kry. Na ‘n paar maande se stap vind ek uit dat ek mos bietjie kan draf. So het my doelwitte stelselmatig verander, want in die begin het dit eers net gegaan oor gewigsverlies, en daarna hoe ver ek kan hardloop en hoe vinnig. Van toe af beplan ek my leefstyl rondom watter resies volgende is, waar ons gesin se volgende vakansie gaan wees en of daar ‘n parkrun en CrossFit-sentrum naby is.”
Maar dit was natuurlik in “the good old days” voor die Covid-19-pandemie ingetree het, sê Jullies. Vir veiligheidshalwe draf sy en haar man Conrad op die oomblik alleen en tussendeur doen hulle ook gereeld CrossFitoefeninge by ‘n plaaslike sentrum.
CrossFit is ‘n tipe sterkte- en kondisioneringsoefeninge wat bestaan uit funksionele bewegings soos hurk, trek en voorwerpe stoot wat op ‘n hoë intensiteitsvlak uitgevoer word.
Jullies weeg tans 70 kg en verduidelik dat oefeninge en draf nie veel help as jy nie gesonde eetgewoontes toepas nie.
“Die eerste ding wat ek gedoen net was om gaskoeldrank en sap uit te skakel. Op my reis het ek ook baie geleer oor wat goeie styselvoedsel is. Dit gaan nie net oor shakes of ‘n pil drink en siedaar, daar het jy resultate soos baie mense dink nie. My huisgesin, wat ook hul eie oefenprogramme het, is byvoorbeeld baie lief vir pizza en soetgoed eet, maar dit sien ons meer as ‘n bederf as enige iets anders. Vir my gaan dit om die regte balans te vind gepaardgaande met baie dissipline.”
Op ‘n vraag wat haar raad vir persone is wat ontevrede is met hul lyf, of wat selfs net ‘n bietjie fikser wil word, het Jullies filosofies geantwoord:
“Kry eers jou kop reg. Daar is geen quick fix nie. Maak jou fiksheidreis jou daaglikse leefstyl, en as jy eers begin moet jy uithou en aanhou!
Verlede Saterdag se toptien tye:
Tarren Jullies -24:43
Francois le Roux- 26:07
Conrad Jullies - 27:43
Annemarie le Roux - 29:37
Abraham Hendricks- 29:57
Bart Saaiman- 30:48
Hildegarde Bruwer- 34:32
Sylvia le Roux- 37:55
Garnett Wicomb- 45:00
Echbert le Roux-57:06