Transitoroof; Ooggetuies vertel
Die drie verdagtes wat Maandag kort na ‘n transitorooftog gearresteer is, het Woensdag in die Oudtshoorn-landdroshof verkyn. Masixole Dolomba, Simphiwe Matwa en Lwandiso Lento is al drie van George. Die saak teen Dolomba is tot Woensdag 28 Julie uitgestel sodat hy ‘n regsverteenwoordiger kan bekom en die saak teen die ander twee is vir ‘n formele borgtogaansoek tot 3 Augustus uitgestel. Al drie bly in aanhouding tot dan. Hulle is tussen 26 en 41 jaar oud.
Die gewaagde rooftog waarmee die drie verdagtes verbind word, het Maandagoggend omstreeks 11:15 plaasgevind toe R86 000 van ‘n Fidelity Cash Solutions-geldwa by die Atlantic Oilvulstasie oorkant die Bridgton-polisiestasie gebuit is. Hulle is skaars ‘n uur later deur die polisie vasgetrek.
Twee van die drie rowers het volgens ‘n ooggetuie doodluiters by die vulstasie uitgeklim, ‘n vuurwapen uitgehaal en ‘n niksvermoedende Fidelity-sekuriteitswag gestormloop.
“Dit was soos ‘n movie wat voor my afgespeel het,” vertel die ooggetuie.
“Ek het oorkant die pad gestaan toe ek ‘n vuurwapen hoor cock en dis wat my aandag na die toneel getrek het. Twee manne met buffs en mussies het die wag agter die Fidelity-bakkie ingewag en vasgegryp. Hulle het toe ‘n sak geld en die wag se vuurwapen afgevat en hom aan die bakkie met hul eie boeie vasgemaak.
“Die rowers het nie eens weggehardloop na hul wit Toyota Conquest wat voor die garage gestaan het nie. Dit was so smooth gedoen dat ek die indruk gekry het dat dit haarfyn beplan was. Die petroljoggies was ook nie bewus van die rooftog nie omdat dit so vinnig gebeur het. As ek nou terugdink besef ek dat enigeen wat iets op daardie oomblik sou probeer doen om die rowers te keer, dalk geskiet sou word.”
Die ooggetuie sê omdat daar gewoonlik altyd karre voor die vulstasie staan het niemand onraad vermoed nie.Nog ‘n ooggetuie, wat besef het dat ‘n rooftog pas plaasgevind het, het besluit om die wit Conquest agterna te sit.
“Hulle het in die rigting van Timbercity gery terwyl ek op ‘n veilige afstand gevolg het. Ek het gesien dat twee rowers in ‘n silwer Nissan Sentra op die hoek by die Timbercity-sirkel oorklim. Die Sentra het toe George se kant toe gery, terwyl die Conquest om die sirkel is.” Die Valke se eenheid vir ernstige georganiseerde misdaad het die Sentra, wat voldoen het aan die beskrywing, sowat ‘n uur na die rooftog in die Outeniquapas opgemerk.
Volgens Zinzi Hani, woordvoerder van die Valke, is die verdagtes in hegtenis geneem en is daar beslag gelê op ‘n die sak met gesteelde geld en twee 9 mm-vuurwapens wat die Fidelity-vuurwapen wat geroof is, insluit.
Die waarnemende provinsiale hoof van die Valke in die Wes-Kaap, brig. Ruanette Walters, het die ondersoekspan vir hul vinnige inhegtenisneming van die verdagtes geprys.
Wahl Bartman, uitvoerende hoof van Fidelity Services Group, het op sy beurt in ‘n persverklaring die polisie en privaat sekuriteitsmaatskappye bedank vir hul flinke optrede wat gelei het tot die vinnige arrestasies van die rowers. Al die gesteelde geld is volgens Wahl teruggevind. Volgens die eienaar van een van die dorp se sekuriteitsmaatskappye het kamers in die dorp ook daartoe bygedra om te bevestig in watter rigting die verdagtes gevlug het.