Vlak 5-waterbeperkings
OUDTSHOORN - Die vlak van die Raubenheimerdam, die hoof waterbron in die Groter Oudtshoorn, is tans op 37%, wat beteken dat vlak 5-waterbeperkings onmiddellik in werking sal tree.
Volgens Aurelia Mle, woordvoerder van die Oudtshoornmunisipaliteit, doen die uitvoerende burgemeester ‘n dringende beroep op alle inwoners van die Groter Oudtshoorn om water uiters spaarsamig te gebruik.
“Sedert einde 2020 was daar geen noemenswaardige reën in die opvangsgebied van die Raubenheimerdam nie. Die vlak van die dam het gevolglik konstant afgeneem en staan tans op 37% wat gelykstaande is aan ongeveer 200 dae se water vir Oudtshoorn. Indien die opvangsgebied nie binnekort goeie reën kry nie, staar ons ‘n ernstige waterkrisis in die gesig.”
Inwoners word daarop gewys dat oortredings van die beperkings strafbaar is met ‘n boete van R1 000.
Indien inwoners bewus is van enige persone wat die beperkings oortree, kan dit anoniem aangemeld word by die volgende nommers: Tussen 07:30 en 16:00: 044 203 3090/3086, na-ure: 044 203 7800.
Macpherson het Maandag tydens ‘n mediasessie die droogte in die hele gebied bespreek. Hy het spesifiek verwys na die beroep wat landbouers op die munisipaliteit en ander munisipaliteite in die omgewing gedoen het om die regering te oorreed om die streek as ‘n droogterampgebied te verklaar.
Tydens die sessie het Macpherson gesê dat Oudtshoorn- en George-munisipaliteit sowel as die Garden Route-distriksmunisipaliteit besig is met ‘n assessering van die droogtetoestand om ‘n voorlegging aan die regering te doen.
Macpherson het na die watertafel verwys wat besig is om te daal en sommige boorgate laat opdroog. Terselfdertyd is daar egter sterk water in die Calitzdorpomgewing raakgeboor en daar word op finansiering van die regering gewag om die pyplyn vanaf die Blossoms-waterprojek na Oudtshoorn aan te lê. Die pyplyn sal oor ongeveer 23 km strek en sal hoofsaaklik onder die grond wees sonder om ‘n impak op boerderybedrywighede te hê.
Die burgemeester het ook tydens dieselfde sessie na die afgelope dae se geweld en onluste in ander dele van die land verwys en die versekering gegee dat die munisipaliteit en al die ander veiligheidsgroepe op die dorp en in die streek ‘n veiligheidsplan in plek het om enige onrus wat hierheen sou oorspoel die hoof te bied.