Voortrekkers besoek Arbeidsgenot
OUDTSHOORN - CJ Langenhoven is op 15 Julie 1932 oorlede en om sy bydrae tot die Afrikaanse letterkunde en sy kultuurnalatenskap te gedenk, het verkennerseuns van die George Voortrekkerkommando en lede van die FAK in Oudtshoorn ’n krans op Sagmoedige Neelsie se graf by Arbeidsgenot gaan lê. Langenhoven is in 1873 in Hoeko naby Ladismith in gebore en hy het in 1901 in Oudtshoorn kom woon. Langenhoven het in 1914 lid van die parlement geword en het ’n baie groot rol gespeel in die erkenning van Afrikaans as ’n amptelike landstaal en dat Afrikaans as eerste taal in skole geleer word in plaas van Nederlands.
Deur sy toedoen, is Afrikaans amptelik in die parlement gebruik in 1925 en in 1927 erken as een van die amptelike landstale. Hy was ook een van die stigterslede van
Die Burger gewees. Sy bekendste gedig was sekerlik “Die Stem”. Dit is getoonset en was die Volkslied van Suid-Afrika. ’n Gedeelte daarvan is steeds ingesluit in die Nasionale lied.
Hy was lief vir humor in sy skryfwerk. Hy kon mense vermaak en hulle laat lag met sy skryfwerk. Die denkbeeldige olifant “Herrie” wat hy in van sy stories gebruik het, is alombekend en sy stories lees vandag nog lekker.
Langenhoven se versamelde werke van al sy skryfwerk bestaan uit 16 volumes.
Na die kranslegging verlede week het die groep ook die museum wat in Langenhoven se huis is, besoek. Elizma Smith, projekorganiseerder van FAKkultuurnetwerke in die Wes-, Suid- en Oos-Kaap, sê: “As jy hierdie pragtige huismuseum besoek, leer ken jy ander kante van Langenhoven. Sy kreatiwiteit het nie opgehou by skryf nie. Hy was ’n meubelmaker wat die hek en van die meubels in sy huis self gemaak het in sy houtwerkkamer. Die plakpapier in die huis het hy self ontwerp en in Londen laat maak. Jy hoor ook dat Arbeidsgenot die eerste huis in Oudtshoorn was met ’n elektriese stoof en spoeltoilet. Sy gunsteling tikmasjien en die lessenaar waar hy Die Stem geskryf het, is in die huis. Die koppie waarin hy van sy laaste koffie gedrink het voor hy dood is, staan ook op dié lessenaar. In sy kamer is daar ook sy werkshoekie, want hy het blykbaar min geslaap.”