Hoop op oplossing vir kruising
OUDTSHOORN - Daar blyk lig in die tonnel te wees ten opsigte van ‘n oplossing vir die gereelde botsings by die kruising van Van der Riet- en Baron van Reedestraat.
Die Oudtshoorn-munisipaliteit het gereageer op bekommerde motoriste, inwoners en sakelui se beroep om ‘n oplossing vir die kruising te vind. Sakelui wat besigheidspersele naby die kruising het, het sowat ‘n maand gelede met amptenare van die munisipaliteit oor die kwessie vergader. Tydens die vergadering het die munisipaliteit onderneem om die korrekte kanale te volg en ‘n kenner aan te stel om verkeersvloei by die kruising te ondersoek en voorstelle oor beveiliging te maak.
Daar is Donderdag bevestig dat Lyners Raadgewende Ingenieurs van George aangestel is om die verkeersvloei by die kruising en ook vir die gedeelte van Baron van Reedestraat tussen Noordstraat en Kerkstraat te monitor en voorstelle te maak vir ‘n moontlike oplossing.
Rian Lourens, vervoeringenieurspesialis van Lyners, het Donderdagmiddag verskeie rolspelers by die kruising ontmoet om homself van die probleem te vergewis.
Paul Miller van die munisipaliteit se tegniese afdeling het Lourens aan die sakelui by die kruising voorgestel en hulle gevra om die probleem aan hom te verduidelik en insette te lewer. Amptenare van die provinsiale departement van vervoer sowel as Oudtshoorn se verkeershoof was teenwoordig. Volgens Miller het Lyners die opdrag gekry om die verkeersvloei by die kruising en na weerskante toe met Baron van Reedestraat langs te bestudeer. Lyners is ook gevra om by die skouterrein na die aansluiting van Parkweg en Rademeyerstraat te kyk waar ook reeds talle ongelukke plaasgevind het.
Volgens Lourens gaan hulle studie ten minste agt weke duur waarna hulle voorstelle aan die munisipaliteit sal voorlê. Die voorstelle moet ook deur die munisipaliteit aan die provinsiale departement van vervoer voorgelê word aangesien Baron van Reedestraat ‘n provinsiale pad is wat deur die munisipaliteit bestuur word.
Volgens Lourens gaan hulle studie ten minste agt weke duur.