Sopkombuis vier Mandeladag
OUDTSHOORN - Kinders van die Polisiehoogte-sopkombuis wat deur die Seroux-egpaar, Phillip en Susanna bedryf word, het Sondag ter viering van Mandeladag die tuin van die Gospel Revelation Kerk skoongemaak.
Die sopkombuis het in April 2020 in dié kerk begin en sedertdien net van krag tot krag gegaan.
Dit spog vandag met ‘n eie struktuur en ook ‘n nasorgsentrum.
“Ons is groot dank aan die kerk verskuldig en daarom het ons besluit om ter viering van Mandeladag op ‘n beskeie manier ook dankie te se aan die kerk,” sê Phillip Seroux.
Tans word tussen 80 en 100 kinders en bejaardes elke dag van die week iets by die sopkombuis gegee om te eet danksy mildelike bydraes van verskeie barmhartige Samaritane.
Die kinders wat Sondag 67 minute opgeoffer het is Maandag danksy Famsa Karoo vir ‘n uitstappie na die Wilgewandelvakansieplaas geneem.