Harlequins-lid na SA-oefengroep
‘n Groot eer het die plaaslike Harlequins Forces-rugbyklub te beurt geval toe een van sy lede, Ziyanda Ngohlekana, onlangs uitgenooi is om die Springbok Vrouewêreldbekeroefenkamp vanaf 6 tot 20 Augustus by te woon. Ngohlekana wat oorspronklik van die Oos-Kaap is, sê dat sy met die intrapslag dadelik by die Infanterieskool se Harlequins Forcesrugbyklub aangesluit het waarna sy later vir die Suid-Kaapse span uitgedraf het.
“My liefde vir die sport het reeds in 2008 begin toe ek in graad 10 was. Dieselfde jaar het ek ook begin om skole- en klubrugby te speel. Een van my mentors, Alfred Kewana, het my talent raakgesien en my genader na ’n skolerugbytoernooi vir dogters. Dis toe dat hy my van sy planne vertel om ‘n klubspan vir vroue te open en dit is daar waar ek rugby ernstig begin opneem het. “
Sedertdien het Ngohlekana by verskeie geleenthede provinsiale rugbyproewe bygewoon. In 2019 is sy ook as die beste speler van ‘n vrouerugbytoernooi gekies. Kort daarna is Ngohlekana se talent deur die SWD-vrouekeurders geïdentifiseer waarna sy in die senior SWD-vrouespan opgeneem is.
“Ek wil Harlequins Forces-rugbyklub asook sersant Irvin van Wyk bedank wat my gemotiveer het om hard te werk en toegewyd te bly.”
Kolonel Zola Mbi het namens die Infanterieskool se personeel gesê dat hy trots is op Ngohlekana se prestasie en dat hy haar alle sterkte met die proewe toewens. Sy boodskap aan haar is: “Die pyn wat jy vandag voel, sal die sterkte wees wat jy môre sal voel.”