Inentings nou ook by Mediclinic

OUDTSHOORN - Enige lid van die publiek kan nou ook by Mediclinic Klein Karoo aanklop vir inenting. Volgens Hannes Stegmann, algemene bestuurder van die hospitaal het hulle Johnson & Johnson-entstof ontvang en verwelkom hulle enige een, met of sonder mediese fonds, by die inentingsperseel.

“Alle mediese fondse betaal vir die Covid19-entstof as deel van Prescribed Minimum Benefits, so die koste word nie van u spaarplan verhaal nie. Vir pasiënte sonder mediese fondse kry ons vergoeding van die staat,” sê Stegmann.

Die inentingsperseel is geleë aan die agterkant van die hospitaal. Die tye vir inenting is Maandae tot Donderdae vanaf 07:30 tot15:30 en Vrydae vanaf 07:30 tot 12:00.

Mense moet ‘n identiteitsdokument saambring asook ‘n mediesefondskaart vir diegene wat aan ‘n mediese fonds behoort. Die proses is as volg:

Stap 1: U moet self registreer op die departement van gesondheid se EVDS webwerf https://vaccine.enroll.health.gov. za/#/

Stap 2: EVDS stuur dadelik ‘n SMS om te bevestig dat u geregistreer is op die stelsel. As u een maal geregistreer het, bly u op die stelsel.

Stap 3: EVDS stuur ‘n tweede SMS om die fasiliteit, dag, tydgleuf en u spesifieke koeponnommer te bevestig. Hierdie proses neem tyd. Indien u dadelik wil kom, bel die hospitaal (044 272 0111 - opsie 2), dan plaas ons u op die waglys.

Stap 4: Mediclinic Klein Karoo stuur ‘n derde SMS om u welkom te heet en waarin daar ‘n skakel sal wees wat u moet voltooi om sodoende u inligting op ons stelsel te kan registreer.

“Voorkeur word gegee aan mense wat ‘n SMS en afspraak het, maar ons help ook instapgevalle, indien moontlik, anders help ons u registreer om op ‘n alternatiewe dag te kom,” sê Stegmann.

Hy benadruk dat die Covid-19-entstof die enigste manier is om te keer dat verdere variante vorm en om hierdie pandemie te eindig.