Nog GEEN DUIDELIKHEID oor skut
Die ondersoek wat verlede maand deur die uitvoerende burgemeester van die Oudtshoorn-munisipaliteit, Chris Macpherson, in verband met bedrywighede by die munisipale skut gelas is, is steeds aan die gang en die tenderproses oor wie die skut gaan bestuur, is ook nog nie afgehandel nie.
Dit blyk nou ook dat die skut steeds gaan skuif.
Die onsekerheid wat tans heers het in Julie begin na ‘n meningsverskil tussen Oudtshoorn Dogs In Need (Odin) en Macpherson.
Oudtshoorn Courant het op 23 Julie berig dat Odin glo kennis ontvang het dat munisipale amptenare by die skut nie langer met Odin mag saamwerk nie. Macpherson het bevestig dat hy opdrag gegee het dat alle optrede by die skut en alle toegang tot die skut streng gereguleer gaan word terwyl ‘n ondersoek gedoen word oor hoeveel diere by die skut aan wetgewing voldoen, en vir hoeveel daar magtiging verleen is. Intussen het verskeie individue met die burgemeester vergader waarna uiteindelik besluit is om op 13 Augustus ‘n vergadering in die banketsaal te roep. Alle diereliefdadigheidsorganisasies is genooi, met die doel om te kyk of die organisasies en ander individue wat by diereliefdadigheid betrokke is nie kan saamsmelt en een organisasie word nie.
Volgens Ansa de Jager, ‘n lid van die nuutgestigte nie-winsgewende organisasie, Oudtshoorn Diere Herberg (ODH), het die burgemeester gesê indien die organisasies onder een vaandel kan saamwerk sal nog ‘n stuk grond beskikbaar gestel word wat die nuwe organisasie dan kan gebruik as “’n tipe herberg” vir die diere indien hul eienaars hulle nie binne sewe dae by die skut opeis nie. Animal Care Team SA (ACTSA) en Odin het besluit om nie van die samesmelting deel te wees nie, wat gelei het tot die stigting van Oudtshoorn Diere Herberg (ODH).
Colleen Smith, voorsitter van Odin en Vanessa Engelbrecht, voorsitter van ACTSA het die week aan Oudtshoorn Courant gesê dat hulle steeds voortgaan met hul onderskeie organisasies.
“Ons kan nie ons geskiedenis en dit wat ons opgebou het los en van vooraf begin nie. Die instansies se sienings oor goed verskil ook net te veel,” het Engelbrecht gesê.
Volgens Smith is hulle ook nie van plan om Oudtshoorn se diere te los nie.
“Ons bou al ses jaar aan die organisasie en voor die tender nie amptelik aan iemand toegeken word en daar vir ons gevra word om te loop nie, sal ons aanhou om die gemeenskap se diere te help.”
Volgens Phillip Goets, voorsitter van ODH, is hulle missie om fondse te in om die nood van die diere in die dorp aan te spreek.
“Sou die munisipaliteit vir ons die stukkie grond toeken, of sou ons ons eie stuk grond bekom, wil ons die diere ‘n regverdige kans gee om liefdevolle huise te kry. Ons wil nie hê diere wat ‘n kans op lewe het moet net uitgesit word nie. Indien ‘n veearts die voorstel maak dat die dier uitgesit word, sal ons daarby volstaan.”
De Jager het bygevoeg dat die fondse wat hulle tans insamel vir hondekos gebruik sal word sodat hulle dit aan tydelike “fosters”, waar van die honde is, kan skenk.
“Die hokke op die skut se perseel kan nie al die honde wat hulp nodig het dra nie so daar is mense wat van die diere tydelik oppas. Ons gee vir hulle die sakke kos omdat hulle dit nie self kan bekostig om die honde te voer nie.
“Indien daar geld oorbly sal kos vir die honde in die hokke op die skut se perseel en skoonmaakmiddels gekoop word.” Sy het bygevoeg dat hulle ook, indien hulle hokke beskikbaar kan kry, ‘n deel van die perseel wil gebruik waar honde veilig kan wees indien hul eienaars met vakansie gaan. LeeAnn van Sittert se Cat Hotel gaan ook steeds onder ODH voort.
Wat sê munisipaliteit
Volgens Ntobeko Mangqwengqwe, senior woordvoerder van die munisipaliteit, is die minister van landbou, dr. Ivan Meyer, gevra om die ondersoek te doen oor die funksionering van die skut.
“’n Vergadering is ook met die staatsveearts, dr. Cathy Fox, gehou om die kwessies te bespreek. Sy het ‘n verslag aan die minister oorhandig en ons wag vir die uitkoms van dr. Meyer se kantoor. Alle diereliefdadigheidsorganisasies sal ‘n geleentheid hê om vir die posisie by die skut te tender.
“As alle organisasies hande kan neem en onder die vaandel van een organisasie werk sal dit definitief tot hulle voordeel wees.”
Volgens hom sal ‘n aangrensende deel aan die oostelike kant van die skut beskikbaar gestel word vir ekstra hokke.
“’n Amptenaar van die Dierebeskermingsvereniging het gesê dat ‘n nuwe perseel vir die skut en die moontlike ekstra hokke geïdentifiseer moet word wat nie so na aan die rioolwerke is nie. Die hokke sal dus tydelik opgesit word omdat die rioolwerke uitgebrei gaan word.”
Volgens hom kan die diere wat tans daar is, daar bly tot die nuwe organisasie oorneem.
“Die nuutaangestelde organisasie sal die skut, en al die meegaande kwessies, oorneem. Ons filosofie: ‘n Rand verdien, of geskenk in Oudtshoorn, moet in Oudtshoorn bestee word, is op alle organisasies van toepassing.”