Veertien ongeskonde na brand
DYSSELSDORP - Veertien huisbewoners in Kleinhansstraat in die nuwe blok, is ongeskonde nadat ‘n brand Sondagaand omstreeks 22:00 hul woning erg beskadig het.
Volgens een van die huisbewoners, Spaas Lewis, is die oorsaak van die brand onbekend.
“Ons almal het geslaap, maar die rook het my wakker gemaak. Ek het toe dadelik my ma-hulle wakker gemaak wat deur die venster gespring het.
Gelukkig kon almal veilig wegkom. Ek is net dankbaar niemand is beseer nie, want dinge kon so anders gewees het.”
Lewis sê terwyl hulle vir die brandweer gewag het, het die gemeenskap gehelp om die brand te blus.
Onder die huisraad wat vernietig is, was ‘n sitkamerstel, ‘n wasmasjien, ‘n stoof, ‘n televisie en slaapkamerstel.
Die gesin, waaronder sewe jeugdiges, het ook al hul kosvoorraad en klere in die brand verloor.
Die liefdadigheidsorganisasie Sport Buddy Charity het, in samewerking met ander weldoeners, kospakkies en klere aan die gesin verskaf.