Politieke koalisie-huwelik wankel
Gaan die stert weer die hond in Oudtshoorn se politiek begin swaai of is dit reeds die geval?
Dit is die vraag nadat drie partye, wat skaars ‘n jaar gelede onderneem het om hulle kragte “in belang van die gemeenskap van Oudtshoorn” by die DA te gooi, voorverlede Vrydag ‘n ommekeer gemaak het en tydens ‘n raadsvergadering hulle steun aan die ANC gegee het.
Tydens die raadsvergadering van 27 Augustus het die raadslede van Icosa (2), Sarco (1), EFF (1) en ANC (9) saamgespan om die waarnemende munisipale bestuurder, Reginald Smit, terug te skuif na sy pos as direkteur van korporatiewe dienste en hom met iemand van buite, Walter Hendricks, te vervang.
Hendricks was vroeër in diens van die George-munisipaliteit en is tans in ‘n hofsaak oor beweerde bedrog by dié munisipaliteit betrokke.
Tydens die raadsvergadering is ook besluit om twee ander amptenare wat in poste waargeneem het terug te skuif na hulle oorspronklike poste.
Die Oudtshoorn-munisipaliteit het egter ‘n dringende aansoek voor die hof gebring om die besluite as onwettig te verklaar. Die besluite is verlede Dinsdag tydelik deur regter NC Erasmus in die hooggeregshof se in Thembalethu opgeskort. Hy hoor vandag en moontlik môre die saak aan om te beslis of die besluite wettig of onwettig was. Tot dan word die status quo gehandhaaf soos wat dit was voor die vergadering van 27 Augustus.
Mediakonferensie
Die uitvoerende burgemeester, Chris Macpherson, het Maandag tydens ‘n mediakonferensie gesê hy ondersteun demokratiese prosesse.
“As Icosa, Sarco en die EFF besluit hulle wil hulle nou skielik by die ANC skaar, om watter redes ook al, is dit hulle reg, maar dit beteken nie dat onwettig besluite geneem kan word nie,” het hy gesê.
“Geen munisipaliteit kan ‘n buitepersoon lukraak in ‘n posisie as waarnemende munisipale bestuurder aanstel nie. Daar kan wel aan ander munisipaliteite of aan die minister ‘n versoek gerig word om iemand wat in diens is te sekondeer, maar in hierdie geval is die proses onregmatig en daarom het ons ons tot die hof gewend.”
Macpherson sê hy was ook verstom om te verneem dat die onderburgemeester, Gevan Juthe (Sarco), homself as waarnemende burgemeester aangestel het terwyl Macpherson met vergaderings uitstedig was. “Dit is ongehoord, ek was mos nie met verlof of siek nie. Ek het bloot as burgemeester vergaderings en gesprekke saam met burgemeesters en munisipale bestuurders van ander dorpe bygewoon. So ‘n besluit kan slegs geneem word as die burgemeester nie bereik kan word nie, ek was te alle tye beskikbaar.” Macpherson het ook bevestig dat die opposisie partye reeds kennis gegee het dat hulle mosies van wantroue teen hom as DA-burgemeester en Julia le Roux as DAspeaker op die volgende raadsvergadering sal laat dien. Dit is die tweede keer in enkele maande dat hierdie mosies voorgelê word, maar hulle is die vorige keer op die nippertjie onttrek. Volgens hom kan die mosie nie dien nie omdat dit, volgens wet, nie binne drie maande van vorige aanbieding voor die raad gelê kan word nie. Dié drie maande is eers einde September verby.
Hy het ook gesê dat die burgemeesterskomitee verander, Vlancio Donson en Diswayne Maarman is van die komitee verwyder, en Pat Wagenaar en Hendrik Botha is in hulle plekke aangestel. Wagenaar behartig nou die portefeulje van gemeenskapsdienste en Botha korporatiewe dienste. Juthe bly volgens wet op die komitee, maar behartig nie meer sy portefeulje as strategiese dienste nie. Oudtshoorn Courant het
Juthe genader vir ‘n gesprek, maar hy was nie beskikbaar nie.
Met al die binnegevegte is dit duidelik dat Oudtshoorn weereens aan die wispelturigheid van kleiner partye uitgelewer word soos wat die geval was voor die DA se oorwinning in 2016. Voor dit het kleiner partye ook met die ANC saamgesnoer en die spreekwoordelike kitaar geslaan. Die resultaat was ‘n reuseskuldlas waarbinne die munisipaliteit gedompel is.
Wat het skeefgeloop?
Waar die DA in 2016 ‘n groot meerderheid met die munisipale verkiesing behaal het, het sy situasie drasties verander toe vier DA-raadslede verlede jaar bedank het as gevolg van die onenigheid tussen die vorige burgemeester, Colan Sylvester, en die voormalige munisipale bestuurder, Allen Paulse. In die tussenverkiesing wat gevolg het, het die DA bloedneus gekry en moes noodgedwonge na Icosa, Sarco en die EFF vry vir samewerking om aan bewind te bly. As beloning vir die samewerking is Juthe op 3 Augustus in die plek van die DA se Nolothandu Mwati as onderburgemeester aangestel en Donson van Icosa en Maarman van die EFF is in die burgemeesterskomitee ingesluit. Tydens die mediakonferensie, waarop die koalisie verlede jaar aangekondig is, is Juthe en Donson spesifiek gevra of hulle koalisie met die DA slegs ‘n tydelike stap is. Juthe het in reaksie op die vraag daarop klem gelê dat hulle die DA steun ter wille van die gemeenskap en dat daar geen eiebelang betrokke is nie. Met daardie koalisie het die DA en sy koalisievennote 16 setels teenoor die ANC se nege beklee. Nou lyk die prentjie heeltemal anders met die DA op 12 setels en die nuwe koalisie van die ANC, Sarco, EFF en Icosa op 13 setels. Dit is ook nie duidelik of die nuutgevormde samewerking tussen die vier partye sal voortgaan as die hof vandag en môre besluit dat die raadsbesluite onwettig was nie.