Geliefde inwoner sterf
HOFMEYR - Amanda Philps (76), van die plaas Gruisklip in die Hofmeyr-distrik, is die afgelope naweek oorlede nadat sy vir Covid-19-verwante komplikasies gehospitaliseer is.
Sy was alombekend as ‘n hoogs begaafde digter, voordragkunstenaar en sterk sopraan in die Hofmeyr-koor, maar dit was die onbaatsugtige diens wat sy aan die gemeenskap gelewer het, waarvoor sy altyd onthou sal word.
Sy het in 1973 met Theo Philps in die huwelik getree en na Hofmeyr verhuis. “My skoonma was die sterkste en beginselvaste vrou wat ek die voorreg gehad het om te ken,” vertel Kiepie Pienaar, haar skoonseun.
“Sy het ná skool haar onderwyskwalifikasie aan die Universiteit van Stellenbosch voltooi en toe sy in 2001 hoor dat die plaaslike Teviot-plaasskool gaan sluit, het sy besluit om die skool te verskuif na Grootdam, waar sy vir baie jare die plaaskinders vanuit die omgewing, aanvanklik sonder enige vergoeding, onderrig het. Sy het ook sommer self die kinders op die plase gaan haal en na skool weer huis toe geneem, ook sonder enige vergoeding. Honderde plaaskinders kon skoolgaan bloot omdat sy haar oor hulle ontferm het.
“Mettertyd het sy ‘n voltydse departementele onderwyspos by Grootdam-skool beklee en kon sy ook ‘n leedervervoerkontrak met die departement sluit. Sy het tot en met haar siekbed en hospitalisasie nog toegesien dat alle leerders op haar roetes betyds by die skool uitkom.
“Hierdie merkwaardige vrou laat haar drie kinders en hul gesinne na en die hegte familieband wat hulle onder haar sorg gebou het, sal hul deur hierdie moeilike tyd dra,” deel haar suster Naomi Uys mee.