Vrywilligers spring in om omgewing op te ruim
Inwoners van De Rust en Dysselsdorp het by Trapsuutjies, Oudtshoorn se “groen” nie-winsgewende organisasie, ingeskakel om hulle omgewing op te ruim.
Die opruiming was deel van Trapsuutjies se betrokkenheid by die jaarlikse International Coastal Clean-up (ICC) wat in Suid-Afrika deur Plastics SA gekoördineer word. Trapsuutjies hou ook maandeliks ‘n #trashtag-projek waar inwoners genooi word om ‘n geïdentifiseerde area te help skoonmaak.
Met vanjaar se ICC-projek is twee areas geïdentifiseer. Die een was in Dysselsdorp in samewerking met jeugleiers Chad Louw en Dullan Claassen en die ander in De Rust in samewerking met De Rust Primêr. By Donkerhoek in Dysselsdorp het 53 mense, waarvan talle kinders was, saamgespan om 153 sakke gemors op te tel.
In De Rust het 44 leerders en 10 volwassenes genoeg rommel opgetel om 23 swart sakke te vul.
As deel van die ICC-etos is data bymekaargemaak oor die tipe items wat opgetel is en volgens Susan Botha, van Trapsuutjies, is die hoeveelheid verpakkings vir wegneemetes, plastiek- en papierborde, en babadoeke wat mense in die natuur weggooi, verstommend.
“Ons is so dankbaar vir elkeen wat moue opgerol het en ‘n bydrae gelewer het sodat ‘n paar natuurlike areas bietjie skoner is,” sê Samantha Lewis, een van Trapsuutjies se ICC-organiseerders. “Ons groot wens is net dat mense sal ophou mors!”
Trapsuutjies het onlangs die eer te beurt geval om ‘n Caroline Reid-toekenning te ontvang, wat gegee word aan individue of instansies wat aktief help om riviere en die natuur te beskerm.
As jy wil betrokke raak by Trapsuutjies se maandelikse #trashtag, kontak Samantha by carolinel756@gmail.com of 065 801 4810.