WKOD maak stem dik oor Môrester
"Die departementshoof van die Wes-Kaapse onderwysdepartement (WKOD) is die gedelegeerde gesag om die finale besluit oor die aanstelling van skoolhoofde te neem, nie die beheerliggaam nie.
So het die WKOD gereageer op 'n navraag nadat Môrester Sekondêr se beheerliggaam verlede Vrydag 1 Augustus besluit het om die skool se deure tot die volgende Maandag te sluit.
Die beheerliggaam se drastiese optrede volg nadat die skool se waarnemende skoolhoof, Frank Williams, se aansoek om oor te neem as permanente skoolhoof, deur die departement van onderwys (WKOD) afgekeur is. Volgens 'n e-pos van die departement is Williams se aansoek oorweeg, maar is dit afgekeur weens die resultate van sy CBA (psigometriese toets).
Volgens Jan Plaatjies, voorsitter van die skool se beheerliggaam, is die psigometriese toets nie deel van die vereistes van die pos nie en is dit aanbeveel deur 'n maatskappy wat nie deel is van die skool se strukture nie.
Plaatjies sê verder dat Williams vir die afgelope jaar en 'n half lank reeds die waarnemende skoolhoof is en dat hy tot op hede nie 'n voet verkeerd gesit het nie.
"Inteendeel, toe Williams oorneem kon mens sien dat daar ware leierskap in die skool was. Voorheen was die skool disfunksioneel. Matrikulante het ewe skielik hoër slaagsyfers behaal en leerders het op alle vlakke hul ware potensiaal begin wys. Ook die moraal van die leerkragte was op 'n ongekende vlak."
Talle ouers was Maandag by die skool om Williams te ondersteun.
"Ons soek 'n hoof wat 'n pad saam met ons kinders kan stap en wat die nodige wysheid het hoe om met ons kinders te deal. “Williams het ons skool weer die nodige glans kom gee wat afwesig was die afgelope paar jare. Nou wil die WKOD sy harde werk kom ongedaan maak oor 'n simpel psigometriese toets. Hoe kan jy goed genoeg wees om vir amper twee jaar waar te neem, maar jy is nie geskik vir die pos nie?" wou 'n ontstelde ouer weet.
Uitkoms van vergadering
Die WKOD het Maandag tydens 'n vergadering met die beheerliggaam en leerkragte by die skool gesê dat hul voorneme is om Williams weer as waarnemende skoolhoof tot 31 Desember 2022 aan te stel. Williams, wat sedert 1994 by Môrester skoolhou, het egter hierdie versoek van die hand gewys.
Die WKOD het Belinda Muller, adjunkhoof, gevra om waar te neem totdat die departement 'n kuratorhoof aanstel.
Muller het ingestem, maar dit duidelik gemaak dat sy ter wille van die leerders slegs vir een dag (Dinsdag) sal waarneem totdat die kuratorhoof oorneem (Woensdag) soos beloof deur die departement. Muller tree oor 'n maand af nadat sy reeds sedert 1985 by die skool is. Teen druktyd Woensdag (gister) was daar nog geen duidelik oor die aanstelling nie. Daar is egter vergaderings vir gister en vandag beplan.