Mediclinic Klein Karoo reik uit na Nomondé-kleuterskool in Bongolethu
OUDTSHOORN - Verskeie personeellede van Mediclinic Klein Karoo het op Mandeladag die speelterrein van Nomondékleuterskool gaan herstel en opkikker. Hierdie is een van Mediclinic se vele projekte wat hulle vir dié jaar beplan, en omdat tyd vir almal kosbaar is, het Mediclinic Klein Karoo se bestuurspan besluit om nie iets te gaan koop en te skenk nie, maar om fisies hulle 67-minute vir Mandeladag aan die opknap van die kleuterskool se speelterrein te spandeer.
“Dit verg meer van jou om jou tyd te gee, as om iets te gaan koop en te skenk, het Hannes Stegmann, Mediclinic Klein Karoo se hospitaalbestuurder, gesê.
Hoe het Mediclinic Klein Karoo betrokke geraak?
Ons het besef dat ons hierdie jaar self na die gemeenskap wil uitreik, vertel Stegmann.
“Ons het begin rondvra waar ons betrokke kan raak. Daar is so baie geleenthede, maar ons wou iemand in die hospitaal kry wat vir ons kon aandui waar daar in hulle gemeenskap ‘n behoefte is. Dit is meer spesiaal as jou personeel aandui waar ons as hospitaal betrokke kan raak.”
Margo McGear, eenheid administratiewe assistent van Mediclinic Klein Karoo, het aan die bestuurspersoneel genoem dat haar vriendin die bestuurder van Nomondékleuterskool in Bongolethu is en dat daar ‘n groot behoefte is om die speelterrein op te knap.
Ses personeellede van die hospitaal het op Mandeladag ingespring met skuurpapier en helderkleurige verf en binne ses ure die speelterrein in ‘n kinderparadys verander. Die swaaie en gedeeltes van die klimrame is deur Flippie Wiese vervang. Na die tyd is die speelterrein met ‘n valkoog gefynkam en is elke skroef, spyker en draad verwyder om die kleuters die volgende dag terug te verwelkom.
Plan vorentoe vir Nomondé-kleuterskool Stegmann het agtergekom dat die kleuterskool geen finansiering van die staat ontvang nie, en het op navraag besef dat die dak en bedrading nie op die staat se standaard is om te kwalifiseer vir finansiernig nie.
Mediclinic Klein Karoo sal voortaan die Nomondé-kleuterskool bystaan om te registreer by die departement van sosiale ontwikkeling om sodoende die nodige finansiering te bekom om na die 56 kinders om te sien.
Dié hospitaal se tegniese toesighouer, David Fourie, het die NG kerk OudtshoornWes genader, en hulp is aangebied met die vervanging van die dak.
“Meeste materiaal is ontvang, ons is nou net op soek na mense met kundigheid om die dak op te rig,” vertel Stegmann. “Wat die elektrisiteit betref gaan ons die hospitaal se elektrisiën gebruik om die bedrading te vervang.
Inwy van die nuwe speelterrein
Om die nuwe speelterrein te vier, beplan die hospitaal om op 5 Augustus die kleuters met ‘n heerlike ete te bederf.
Indien daar van die publiek is wat voel dat hulle op enige manier betrokke wil raak by Nomondékleuterskool, is hulle welkom om
Hannes Stegmann by 044 272 0111 te skakel.