Memorial Coronationversorgingsoord
OUDTSHOORN - Coronation Memorialversorgingsoord vir bejaardes het onlangs twee nuwe personeellede, sr. Vanessa Jaftha (40), nuwe bestuurder van dié oord en sr. Elaine Wagenaar, verwelkom.
Jaftha is ‘n geregistreerde verpleegster en haar visie vir die oord is om ‘n veilige en gelukkige omgewing vir die inwoners sowel as haar personeel te skep, om sodoende goeie gehalte versorging aan die bejaardes te verskaf, en sy vertel entoesiasties dat sy hierdie dienste wil lewer deur kwaliteit diens te lewer.
Deloris Wewers, wat ook onlangs as mentor aangestel is, se hooftaak is om leiding, advies en ondersteuning aan die bestuur en personeel te bied, om te verseker dat die besluite wat geneem word na die beste belange en behoeftes van die inwoners omsien.
“Ons moet die regte van ons bejaardes respekteer en eer,” het Wewers gesê.
Inwoners se verjaarsdae
Jaftha voel dat die inwoners gelukkig moet wees en reël gereeld op spesiale dae soos verjaarsdae klein funksies.
“Verjaarsdae hier by ons is baie belangrik, en die inwoners ontvang ‘n klein Bybel om die dag spesiaal te maak.”
Jaftha het ook ‘n projek begin waar die publiek betrokke kan raak deur ‘n inwoner op dié spesiale dag te bederf en nooi die publiek uit om haar te kontak indien hulle betrokke wil raak.
Donasieregister
Dié versorgingsoord is ‘n geregistreerde nie-winsgewende organisasie, en verskeie instansies het op Mandeladag en oor die afgelope paar maande skenkings en donasies by die oord afgelewer.
“Ons het oor die afgelope paar maande ongelooflike donasies ontvang, waarvoor ons elkeen hartlik wil bedank.”
Volgens Jaftha word elke donasie wat afgelewer word in ‘n register opgeteken en ontvang die skenker ‘n bedankingsbrief as waardering.
“Ons het ‘n register waarin ons al die donasies vir ouditdoeleindes neerskryf.”
Volgens Ferdinad Hector, voorsitter van die oord, is daar ‘n positiewe luim wat heers en sien hy daarna uit om deel te wees van die nuwe span.
Jaftha het groot drome vir die oord, en vertel baie opgewonde dat sy die oord se volle potensiaal wil benut en graag elke bed in die oord wil vul. Die publiek kan betrokke raak deur Jaftha by 044 272 2702 te kontak.