SWD-vrouerugbyafrigter presteer
Gebore Oudtshoorniet, Elize Arendse, het die afgelope naweek haar dorp se vlag hoog laat wapper toe sy in haar eerste seisoen as vrouehoofafrigter van die SWD Eagirls, die Eerste Divisie-toernooi teen die Leeuperds in Potchefstroom oortuigend met 36 - 14 gewen het. Die halftydtelling was 12 - 7 in
Eagirls se guns. Arendse vertel dat haar span regdeur die toernooi besondere karakter getoon het om hoogaangeskrewe spanne van oor die land kaf te draf op pad na die eindstryd.
Vir die Eagirls het Amy Kay Claassen (slot), Tanya Scholts (flank), Nicolene Barends (vleuel) en Antonicia Hannies (heelagter) elk een drie gedruk terwyl Amanda Klaassen (vleuel) twee keer agter die pale gaan kuier het.
Hannies was ook suksesvol met drie verdoelings.
Agtergrond in rugby
Wat Arendse se prestasie as hoofafrigter betref, het sy gesê dat as die eerste vroulike hoofafrigter van dié span, sy baie uitdagings in die gesig gestaar het.
"As ek nou terugdink besef ek dat my jare lange ervaring as rugbyspeler deurslaggewend was om elke uitdaging met oorgawe en selfvertroue aan te pak. Die grootste ding wat ek van die span opgelet het, is dat ons mekaar ondersteun het in verskillende areas, maak nie saak hoe groot of klein die situasie was nie. Ek het ook altyd leiding van ons Hemelse Vader gevra en dit is die grootste wapen wat ons as 'n span in moeilike tye as 'n eenheid bymekaar gehou het," het sy gesê. Arendse sê dat haar broers en pa rugbyspelers sowel as groot rugbyondersteuners is en vandaar haar liefde vir rugby.
"My rugbyloopbaan het destyds in 2000 by All Blacks-rugbyklub begin. Daarna het ek in 2012 begin afrig waarna ek in 2015 my groot deurbraak by die SWD Juniors as hulpafrigter gekry het. In 2021 word ek hulpafrigter by die senior-vrouespan totdat ek vanjaar met hoofafrigterpos toevertrou is. My raad aan elke jongmens daarbuite is om jou passie te volg en nie op te gee op jou drome nie, want niks is onmoontlik as jy aanhou glo nie."