Tawwe wen vir Bridgton
Bridgton se A-span moes verlede Saterdag harde bene kou om 'n hardnekkige Blanco van George naelskraap met 9 - 3 in 'n SWD Super A-ligawedstryd by die Oudtshoornsportterrein te wen. Oudtshoorn se enigste verteenwoordigende span in dié elite liga is die afgelope ruk onder groot druk nadat hulle reeds nege keer die seisoen verloor het en slegs 'n wiskundige kans het om die halfeindrondes te haal.
Alhoewel die manne in maroen met groot ywer gespeel het, kon hulle nie daarin slaag om 'n enkele drie te druk nie en was die wedstryd grotendeels gekenmerk deur talle hanteerfoute wat beide spanne op die aanval gekniehalter het.
So is die eerste helfte ook afgesluit met Bridgton wat met slegs 3 - 0 voorgeloop het na 'n hoogvat-strafskop op die kwartgebied wat deur Anver Venter (senter) oorgeskop is. Blanco het met die aanvang van die tweede helfte dadelik teruggeslaan en ook van die kwartgebied 'n strafskop oorgeklits wat die telling op drie punte elk gebring het. Venter was kort daarna weer suksesvol met 'n strafskop vlak oor die pale om die drie punte verskil te herstel.
Ofskoon Blanco se swaarder pak voorspelers gereeld voorvoetbal gekry het, kon hulle net nie Bridgton se verdediging binnedring nie; selfs nie toe die einste Venter met 'n geelkaart vir 'n hoogvat gestraf is nie.
In die 10-minute periode wat Venter afwesig was, kon Blanco nie van die gulde geleentheid gebruik maak om die numeriese verskil uit te buit nie. In hierdie verband moet Bridgton 'n pluimpie gegee word vir die blitsvinnige organisering van hul verdedigingstrukture om te verhoed dat Blanco 'n waardevolle drie in 'n laetellingwedstryd druk.
Ironies genoeg toe Venter se 10 minute in die sinbin verstreke was, het hy dadelik 'n monsterstrafskop van bykans vanaf halflyn oorgeskop wat ook die laaste punte van die wedstryd sou wees. Eindtelling 9 - 3.
As dié wedstryd met 'n motorrit vergelyk kan word, is dit veilig om te sê dat dit nooit uit derde rat gekom het nie; maar in sportterme bly 'n wen 'n wen; ongeag. Dis duidelik dat harde werk vir Bridgton voorlê veral inaggenome dat gedugte spanne soos Progress, Crusaders, Heidelberg, Eagle Stars en Jaguars nog voorlê.