DA wil Prins Albert oorneem
Die DA in Prins Albert het die afgelope Saterdag geen geheim daarvan gemaak dat hy die munisipale raad met ’n volstrekte meerderheid wil oorneem nie. Dit is omdat koalisiebestuur onstabiliteit veroorsaak en selde tot voordeel is van ’n dorp en gemeenskap.
Dit was die boodskap van die speaker van die raad, Stoffel Botes, en die waarnemende burgemeester, Linda Jaquet (albei DA), aan Anton Bredell, LUR vir plaaslike regering, omgewingsake en ontwikkelingsbeplanning, en Sharna Fernandez, LUR vir maatskaplike ontwikkeling, wat die dorp Saterdag besoek het.
Volgens Botes was daar, “sedert Prins Albert in 2006 meestal deur partykoalisies regeer is, onstabiliteit in die raad. Dit was nie anders sedert die munisipale verkiesing in November verlede jaar nie”.
Die ANC/KGP/PA-koalisie het intussen sy greep op die raad verloor toe Margy Jaftha, tot onlangs KGP-burgemeester, uit haar party geskors is omdat sy die DA in bepaalde belangrike besluite ondersteun het. Jaftha moes haar setel (wyk 4), sowel as burgemeesterspos prysgee, wat ’n munisipale tussenverkiesing in dié wyk op 14 September noodsaak.
“Ons het verwag dat die koalisie sy oorname gaan verloor; net nie dat dit so gou gaan gebeur nie,” het Botes aan die gehoor gesê.
“Die DA se aktiviste is op die grond en ons maak ons gereed om Prins Albert die volgende vier, vyf jaar vorentoe te neem. Die DA weet hoe om goed te regeer. As ons die geleentheid kry om te lei, gaan niemand die dorp weer by ons afvat nie.”
Volgens Bredell, die langsdienende kabinetsminister in die Wes-Kaap, is dit belangrik om ervare mense aan te stel. “Hulle moet geskik wees vir die poste wat hulle vul. Ons glo nie aan kader-aanstellings wat geld verdien om te sit en borrels blaas nie.”
Met verwysing na Jaftha se posisie as DAkandidaat in wyk 4, het Bredell gesê: “As iemand sy of haar pos ontruim op grond van beginsels, kan ek met so iemand saamwerk. Margy Jaftha het gewys sy lei op grond van integriteit en ’n bepaalde waardestelsel. Inwoners van die Wes-Kaap neem dinge dikwels as vanselfsprekend, omdat die provinsie goed geregeer word en besef nie altyd wát alles verrig word nie – soos die bou van brandweerstasies en ambulansstasies, soos die herseël van paaie. Ons glo aan saamwerk. Dis waarom koalisiepolitiek nie vir Afrika werk nie," het Bredell by Botes aangesluit.
Van die Wes-Kaap se spesifieke uitdagings wat oorkom moet word, is elektrisiteitsvoorsiening, migrasie na die Wes-Kaap, onwettige plakkery en waterkwessies.
“Ons moet buite die boks dink oor die vestiging van mense en die voorsiening van water. Die ANC-regering het sedert 1991 net twee groot opgaardamme gebou. Van 1960 tot 1991 is 18 damme gebou. Nog groot opgaardamme, asook die vergroting van bestaande opgaardamme, is op die tafel in die Wes-Kaap.”
Tydens vraetyd wou Prins Alberters veral meer weet oor die gerugte van uraanontginning sowat 20 km van die dorp, asook oor die uitbreiding van die dorp se wateropgaarvermoë. Oor albei sake sal hy ondersoek laat instel, het Bredell gesê.