DA na 28 jaar alleen in beheer in Prins Albert
PRINS ALBERT - Die drie belangrikste poste in die munisipale raad van Prins Albert is Dinsdag op ’n spesiale vergadering toegeken aan drie DA-lede. Dit kom nadat dié party ná ’n tussenverkiesing op 14 September vir die eerste keer in 28 jaar ’n volstrekte meerderheid behaal het.
Die nuwe burgemeester is Linda Jaquet, die onderburgemeester Stof fel Bote sen die speaker Margy Jaftha. Die vierde DA-lid is Sydney Koonthea, wat aangewys is as voorsitter van die oorsigkomitee sowel as van sommige portefeuljekomitees.
In die Sentraal-Karoo is dit die eerste keer sedert 1994 dat die DA alleen in beheer is van ’n munisipale raad. Die opposisie, ’n drie party koalisie, bestaan uit drie lede: Elsabe Maans (ANC), Kiewiet Baadjies (KGP) en Arnold Mackay (PA).
Dit kom nadat Margy Jaftha (voorheen van die Karoo-Gemeenskapsparty, of KGP) haar wyk (4) suksesvol as DA-lid in die tussenverkiesing verdedig het. Sy het haar sowat vier maande gelede by die DA geskaar weens ’n geskil tussen die partye oor die prosedures vir die aanwysing van ’n nuwe munisipale bestuurder. Jaftha het dit duidelik gestel dat sy haar nie kan vereenselwig met die manier waarop haar destydse koalisiegenote, die PA en ANC, besluite wil neem nie. Sy is toe uit die KGP geskors en het haar pos as burgemeester verloor. Dinsdag is sy weer as raadslid ingesweer, dié keer as DA-verteenwoordiger.
Sharna Fernandez, D A-kies afdelingshoof vir Prins Albert, het gesê dis 'n keerpunt vir die Prins Albert-munisipaliteit. “Onder die leierskap van burgemeester Jaquet en die volle raad sal inwoners die DA-verskil ervaar, waar dienste gelewer word en korrupsie nie geduld sal word nie. Verandering is op pad na die Sentraal-Karoo.”
Die DA maak geen geheim daarvan nie dat hulle nou hul visier op die hele streek stel.
Jaquet, wat die afgelope maande in Jaftha se plek as burgemeester waargeneem het, het in haar aanvaardingstoespraak gesê dienslewering en volhoubare finansiële bestuur is van haar grootste prioriteite – so ook politieke stabiliteit, ’n professionele bestuurstyl en veiligheid vir die inwoners van die dorp en omliggende gebiede. Jaquet het nie geskroom om ’n tydsraamwerk te plaas by die ondernemings wat sy verskaf het vir die lewering van bepaalde dienste nie – onder meer grondgebruik, ’n ruimtelike ontwikkelingsplan, ’n sindelike omgewing, wetstoepassing, omgewingsake wat herwinning insluit, gemeenskapsveiligheid, die regruk van die Prins Albertse vliegveld, die herstel van slaggate, maatskaplike ontwikkeling, samewerking met die dorp se toerismevereniging en skole, asook die instel van ’n diensnommer waar inwoners met navrae kan skakel.
Samewerking van die DA met ander partye in die raad, asook met die hele gemeenskap, is hoog op haar agenda. Sy het haar medepartylede sowel as kiesers bedank vir die vertroue wat hulle in haar en in haar party gestel het.
Volgens Botes kry die DA nou uiteindelik as meerderheidsparty in die raad die geleentheid om ’n verskil te maak. “Ek besef dat die Wyk 4-kiesers onder moeilike omstandighede gaan stem het. Ek bedank hulle daarvoor.”
Hy gaan ’n aktiewe onderburgemeester wees wat “uitgaan en werk,” het hy gesê. Hy het sy opposisie in die raad genooi om met die DA saam te werk en sodoende die hele gemeenskap te dien.
Die DA het ook die voorsittersposisies op al die portefeuljekomitees ingeneem.