Heldeontvangs vir dapper stapper Brian Daniels

2022-09-30 - WYNDHAM EWERTS

"Ek is baie bly dat ek my jare lange droom kon bewaarheid om my staptog te voltooi om geld vir die Rooikruis-kinderhospitaal in te samel."

So het die bekende atleet en adjudantoffisier, Brian Daniels (52), Maandagaand in sy toespraak gesê waar hy 'n heldeontvangs van vriende, familie en kollegas net buite Oudtshoorn ontvang het.

Oudtshoorn Courant het reeds in 2020 berig oor Daniels se edele voornemens, maar moes hy dit ongelukkig weens Covid-19 kanselleer.

Vanjaar het hy weer die bul by die horings gepak en sowat twee weke gelede sy staptog vanaf Oudtshoorn na Kaapstad via die R62roete aangedurf. Hy en sy twee spanlede, een wat die administratiewe gedeelte van die wedloop hanteer en een wat Daniels se persoonlike motor bestuur, het na elke 50 km 'n aand of twee in 'n dorp oornag en in hierdie verband, het Daniels sy opregte dankbaarheid uitgespreek: “Dankie vir beskermingsengele wat die Vader op ons pad gesit het waarsonder hierdie poging definitief nie moontlik sou wees nie."

Oor die staptog self sê Daniels dat hy dit baie geniet het alhoewel hy in Worcester, na 310 km ('n groot prestasie alreeds), deur 'n mediese dokter streng aangeraai is om nie sy staptog voort te sit nie.

"My hele lyf van bo tot onder by my enkels was in tip top kondisie, maar die dokter het bevind dat ek die risiko sal loop om my voete te beskadig. Ek moet bieg, ek het 'n bietjie af gevoel en geworstel met myself oor die dokter se bevinding, maar op die einde van die dag het ek maar ingegee en besluit om gehoorsaam te wees," skerts hy.

Daniels sê dat twee stapmaats die volgende dag in Worcester by hom kom inloer het en net daar en dan is daar besluit dat hulle twee die oorblywende 110 km namens Daniels sou aflê.

Na 12 dae het Daniels en sy span uiteindelik by hulle bestemming aangekom waar hulle, soos in Oudtshoorn, soos helde ontvang is. Hier het Daniels die R34 000 aan Rooikruis-kinderhospitaal oorhandig wat dit sal aanwend vir hul terapeutiese speelkamer. In sy oorwinningstoespraak het hy bevestig dat daar planne in die pyplyn is om die "pelgrimsreis" soos hy dit noem, 'n tweejaarlikse instelling te maak.

"Kyk, sonder twyfel het ek die afgelope 12 dae baie wys geraak in terme van beplanning vir so tipe staptog. Die kanse is groot dat ek 'n addisionele stapper op hierdie reis sal neem en dan kan ons die roete in skofte aanpak. Vir my alleen sou dit baie makliker gewees het om die staptog Kaap toe in drie weke te voltooi in plaas van twee, maar ek en my span het besluit dat dit te lank sal wees om op die pad te wees. Met 'n ekstra stapper sal die tydperk om in die Kaap uit te kom selfs minder as twee weke wees. Ook sal dit baie help as 'n borg aan boord kan kom wat drafskoene kan verskaf, want ek het met slegs een paar Kaap toe gestap, en om jou staptog so gemaklik moontlik te maak, het jy ten minste vier paar nodig," het Daniels gesê.

Voorts beoog hy ook om sy Facebookblad, Karoo to Coast for Children, wat die afgelope ruk groot aftrek op sosiale media gekry het, gereeld op te dateer om lesers op hoogte te hou van die nuutste verwikkelinge.

Hy het ook die publiek aangemoedig om steeds R100 kaartjies te koop om sy oorspronklike teiken van R50 000, 'n realiteit te maak.