Huis Triomf ondergaan ‘n gedaanteverwisseling
OUDTSHOORN – ACVV Huis Triomf, 'n kinder- en jeugsorgsentrum in Wagenaarstraat, Oudtshoorn, het in die afgelope jaar opslae gemaak – eers met sprake dat die deure van die kinderhuis finaal gaan sluit en toe weer dat die deure gaan oopbly.
Huis Triomf het die afgelope paar maande aan verskeie deure gaan klop, in die hoop dat hulle die kinderhuis moontlik kon skuif na 'n area wat meer "kindervriendelik" sou wees.
Huis Triomf, of Elroi in association with ACVV and The Barn soos dit van volgende jaar af bekend gaan staan, ondergaan tans ‘n totale gedaanteverwisseling. (Rede vir die Engelse benaming is dat oorsee se persone ook dit kan verstaan).
Volgens Roelof Kwant, pastoor by Barn Christian Fellowship in Johannesburg, voorsitter van Huis Triomf en ook aan die stuur van die veranderinge by Huis Triomf, vertel dat daar ongelukkig geen geskikte perseel gevind is om heen te skuif nie en daar moet nou die beste gemaak word met wat daar is.
Daar word vier fases beplan om opgradering en ondersteuning aan Huis Triomf te bied.
Die geld vir die veranderings wat tans aangebring word, word verkry uit die fondsinsameling wat Barn Christian Fellowship ten bate vir ACVV Huis Triomf, gehou het. Baie van die veranderings word ook gedoen met skenkings van verskeie besighede.
Eerste fase - personeel
Kwant en sy vrou Carol, vertel dat hulle tevrede is met die personeel wat tans in diens van Huis Triomf is en dat hulle beplan om leiding aan die personeel te voorsien.
Tweede fase - gebou
Verskeie besighede het skenkings en/of afslag gegee om die verbeterings aan te bring - Easylife Kitchens in George, gaan die hele kombuis oordoen, Timbercity en Build it in Oudtshoorn het skenkings, sowel as afslag op sekere aankope gegee.
Tans word die gebou se verbeterings in fases opgedeel en beplan Kwant en sy span om voor die einde van die jaar alle werk in die gebou te voltooi.
Daar word tans op die kombuis, spens, was-, eet-, en badkamer gefokus. Die vensterrame in dié areas sal met aluminiumvensters vervang word en nuwe teëls sal gelê word.
Derde fase - programme
Fase drie is die hersiening van die kinders se programme om hulle te stimuleer en te onderrig.
Vierde fase - ontspanning
Fase vier sal die aanbring van sportgeriewe, ontspanningslokale en ‘n muur rondom Huis Triomf insluit.
Kwant is baie positief oor die veranderinge en nooi die groter Oudtshoorn uit om deel te vorm van Huis Triomf.
"Ons wil Oudtshoorniete betrek wat basiese en groot take kan verrig," nooi Kwant uit.
Ons vra ook die gemeenskap om, wanneer hulle skenkings aan die kinderhuis maak, eers te hoor of daar ‘n behoefte na die item/s is, want daar is dalk ‘n groter behoefte na dit op ‘n ander plek.”
Naamsverandering
"Vanaf volgende jaar sal ACVV Huis Triomf as 'Elroi, in association with ACVV and The Barn', bekendstaan en is die nuwe naam klaar geregistreer. Elroi beteken, ‘God wat ons sien’, vertel Kwant.
Volgens hom word daar nog aan die ontwerp gewerk en Charl Meyer, eienaar van Proworx het klaar ingestem om die nuwe naambord aan hulle te skenk.
Wat sê Oudtshoorn-munisipaliteit?
Die gebou waarvan ACVV Huis Triomf tans gebruik maak is die eiendom van Oudtshoorn-munisipaliteit en volgens Hannes Visser, media- en kommunikasiebeampte in die kantoor van die burgemeester, ondersteun die munisipaliteit alle verbeterings en veranderings wat in oorleg met die munisipaliteit deur die privaat inisiatief aangebring word.
Die Oudtshoorn-munisipaliteit het ook gesprekke met die eienaars van die omliggende besighede gevoer om te kyk tot watter mate hulle ook samewerking kan gee om die omstandighede by Huis Triomf te verbeter.
ACVV se rol in Huis Triomf se toekoms
Eunice Strydom, streekbestuurder van ACVV Klein-Karoo, het hul volgehoue betrokkenheid by ACVV Huis Triomf (Elroi-kinderhuis) bevestig en genoem dat takke wat by die ACVV-hoofbestuur geaffilieer is, die beskerming van die moederliggaam geniet.
Lees asb die volledige berig aanlyn by www.oudtshoorncourant.co.za of op die
Oudtshoorn Courant se Facebook-blad.