Dispuut tussen museum en munisipaliteit duur voort
OUDTSHOORN - "Ek wil dit baie duidelik stel dat die uitsettingsbevel op die raad van die CP Nel-museum beteken is en dit nie gedoen word om die museum te sluit nie. Die uitsetting van die museumraad is ‘n dringende ingryping voordat onomkeerbare skade aan die dorp se kultuurerfenis aangerig word."
So het Oudtshoorn-burgemeester, Chris Macpherson, die week gesê na die munisipaliteit hul prokureur Christo van der Bergh, opdrag gegee het om 'n aanmaningsbrief te skryf waarin hulle versoek dat die museumraad ontbind. Volgens 'n verklaring wat die week deur die burgemeesterskantoor uitgereik is behoort die museum aan die mense van Oudtshoorn en is daar kommerwekkende kwessies en optredes wat deur die huidige museumraad toegepas word wat nie verder toegelaat kan word nie. Een van die kwessies is die samestelling van die museumraad.
"Die samestelling van die huidige museumraad is nie verteenwoordigend van die inwoners van Oudtshoorn nie en het geen verteenwoordigers uit die bruin gemeenskap nie. Die twee verteenwoordigers van die munisipaliteit en die Tuinroetedistriksmunisipaliteit word totaal deur die museumraad geminag en word by geen vergadering ingesluit nie. Die museumraad bestaan hoofsaaklik uit mense van buite Oudtshoorn wat aangestel is en geen belang by die dorp het nie," lui die verklaring.
Volgens Macpherson word die Vriende van die Museum ook heeltemal misken.
"Die Vriende van die Museum, wat reeds vir dekades die belange van die museum tot voordeel van die dorp op die hart gedra het en die museum gefinansier het, word heeltemal misken. Tot op hede het die nuwe museumraad geen finansiële state beskikbaar gestel om te toon hoe die meer as ‘n miljoenrand wat deur die Vriende van die Museum ingesamel is, aangewend of belê is
nie."
Hy sê verder dat die museumraad sonder magtiging van hulle provinsiale ministerie hooggeregshofsake aanhangig gemaak teen die Oudtshoornbesigheidskamer, -toerisme en Agri Klein-Karoo wat daarop uitgeloop het dat twee van die instansies na ander persele verhuis het. Die museumraad het ook regstappe geneem om die ontwikkelaars van die Queen’s Mall te verhoed om die parkeerarea op te knap. Dit nadat die ontwikkelaars van die Queen’s
Mall miljoene der miljoene rande in die ontwikkeling ingeploeg het.
"Die ontwikkelaar het ook sy voorneme om op eie koste aantreklike afdakke vir die vereverkopers langs die museum op te rig, laat vaar as gevolg van die inmenging van die museumraad."
Macpherson sê met die ondertekening van die oorspronklike ooreenkoms tussen die museum en die munisipaliteit in 1974 het die ou skoolgebou waarin die museum tans is, oor twee erwe gestrek. Hierdie erwe sluit die biblioteekgebou en ‘n groot gedeelte van die parkeerarea van die Queen’s Mall in. Die huidige museumraad eis nou dat hulle volle beheer oor die hele terrein en eiendom het wat glad nie die oorspronklike bedoeling van die ooreenkoms was nie.
"As burgemeester is ek ook erg bekommerd oor die manier waarop die museumraad tans die Le Roux-dorpshuis bestuur en die wyse waarop daar doelbewus gepoog word om verkose raadslede van Oudtshoorn-munisipaliteit by vergaderings en besluite uit te sluit. Dit beteken dat die munisipaliteit geen beheer het oor die bestuur van sy eie eiendomme en bates van die gemeenskap nie."
Die museum is ook agterstallig met hul dienstegeld. Volgens die verklaring het die museum die afgelope aantal jare geen erfbelasting, water of kragverbruik betaal nie. ‘n Rekening vir hierdie agterstallige gelde word nou op die museumraad beteken.
"Dit is vir my as burgemeester skokkend dat so ‘n belangrike erfenis en toerisme aantreklikheid misbruik en in der waarheid geskaak word vir mense se persoonlike agendas ten koste van Oudtshoorn se mense. Die CP Nel-museum behoort aan Oudtshoorn en moet deur Oudtshoorn bestuur word."
Tania Colyn, woordvoerder van die departement kultuursake en sport het by navraag gesê dat die departement bewus is van die dispuut oor die huurooreenkoms tussen die Oudtshoorn-munisipaliteit en die museumraad van die CP Nel-museum.
"Ongelukkig was vorige pogings tot mediasie om die kwessie tussen die partye op te los, nie suksesvol nie. Die departement moedig die twee partye aan om direk met mekaar in kontak te kom en om die kwessie direk aan te spreek om n oplossing te vind."
'n Navraag in die verband is ook aan Moses Mthethwa, museumbestuurder gestuur. Hy het onderneem om die navraag deur die loop van die week te beantwoord.
Die CP Nel-museum behoort aan Oudtshoorn en moet deur Oudtshoorn bestuur word.