Raadslid Nyuka word borgtog geweier
OUDTSHOORN – Mlandeli Nyuka, onderburgemeester van die groter Oudtshoorn-munisipaliteit en Suid-Kaap Saamstaan-raadslid, is Dinsdag 1 November borgtog in die landdroshof geweier.
Die aanklag teen hom kan nie bekendgemaak word voor hy nie gepleit het nie.
Nyuka is op 2 Oktober in hegtenis geneem nadat hy op 27 September by ‘n voorval betrokke was wat by die munisipale kantore plaasgevind het. Die staatsaanklaer, Jacolize Jordaan het die hof versoek om nie borgtog aan Nyuka toe te staan nie, omdat borgtogvoorwaardes van ‘n vorige saak wat nou van die hofrol verwyder is, nog ten tyde van sy arrestasie geldig was.
Nuyka se vorige veroordelings teen hom is kwaadwillige saakbeskadiging en diefstal.
Arrestasie op 2 Oktober
Die ondersoekbeampte ao. Wanita Uys het tydens die vorige hofverrigtinge getuig dat Nyuka nie sy samewerking tydens sy arrestasie gegee het nie. Volgens Uys wou hy ook nie die klaer se persoonlike besittings, wat ná die voorval in sy kantoor gelaat is, aan die klaer terug besorg nie. Met sy inhegtenisname drie dae later het hy gesê dit is nie sy werk om na Uys toe te gaan nie, maar haar werk om na hom te soek. Uys het ook borgtog teengestaan.
Vorige veroordelings
Strydom het gesê die hof kyk na Nyuka se vorige veroordelings.“Die hof kan nie voortgaan om die misdaad te ignoreer nie, daar is ‘n patroon wat besig is om te ontstaan.” Strydom het die borgtogaansoek op grond van die Kriminele Prosedure Wetgewing 60 (4) (a) en 60 (4) (b) teengestaan. Nyuka bly in aanhouding en verskyn weer op 22 November sodat ‘n streekhofdatum bepaal kan word.
Burgemeester oor Nyuka
'n Mediaverklaring is gister deur Chris Macpherson, burgemeester van Oudtshoorn, oor raadslid Nyuka, uitgereik. Hannes Visser, woordvoerder vir Macpherson verduidelik dat die verklaring deur
Macpherson uitgereik word aangesien dit die raad, en nie die administrasie raak nie.
Volgens Macpherson het hy al talle medianavrae ten opsigte van die raadslid se huidige en toekomstige rol as raadslid ontvang.
"Dit is uiters belangrik om te weet dat die wetlike voorskrifte baie duidelik is oor die posisie van raadslede wat deur ‘n demokratiese proses verkies is." Macpherson sê dat die Onafhanklike Verkiesingskommissie (OVK) ‘n raadslid slegs kan verwyder of ‘n vakature verklaar indien:
1. ‘n Raadslid bedank.
2. ‘n Raadslid te sterwe kom.
3. ‘n Raadslid se party hom skors.
4. ‘n Raadslid deur die provinsiale minister van plaaslike regering verwyder word.
5. ‘n Raadslid skuldig bevind word aan ‘n misdryf en direkte gevangenisstraf van ten minste twee jaar sonder die keuse van ‘n boete opgelê word.
"Dit beteken dat die burgemeester, munisipale bestuurder of raad nie oor die bevoegdheid beskik om ‘n raadslid wat by ‘n regsproses betrokke is, summier te kan verwyder nie," skryf Macpherson. In die mediaverklaring skryf hy ook dat hy talle medianavrae rakende die moontlikheid van ‘n interne ondersoek deur die munisipaliteit, ontvang het.
"Let asseblief daarop dat geen klag oor die beweerde voorval by die burgemeester of die munisipale bestuurder aanhangig gemaak is nie. Die munisipaliteit beskik dus oor geen gronde vir ‘n interne ondersoek nie. Die kwessie is tans deel van ‘n regsproses wat die finale uitkoms sal bepaal," lui die verklaring.