Monsoon Restaurant beteken vol beddens
OUDTSHOORN – 'n Oudtshoorn- en De Rust-toerisme netwerkaand het op 26 Oktober by Cango Wildlife Ranch plaasgevind. Hierdie was die eerste netwerkaand wat vir die nuwe finansiële boekjaar gebou is. Die geleentheid is ook gebruik om die nuwe Indiese Monsoon Restaurant, wat onlangs by Cango Wildlife Ranch geopen is, bekend te stel.
Andrew Eriksen, besturende direkteur van Cango Wildlife
'n Oomblik van stilte is vir Andrew Eriksen, besturende direkteur van Cango Wildlife, wat op 24 Oktober oorlede is, gehou. Carmen Ellis, assistentdirekteur van Cango Wildlife Ranch het vertel dat Eriksen baie na dié netwerkaand uitgesien het en dat hy groot drome gekoester het vir die nuwe afdeling van die Cango Wildlife Ranch.
Belangrikheid van kos in die toerisme bedryf
Tammy Moult, voorsitter van Oudtshoorn- en De Rust-toerismekantoor het vertel dat daar 'n toename in toeriste van die midde-ooste én Halaal-families van Kaapstad is. Sy het vertel dat kos 'n geweldige groot rol in die toerismebedryf speel en dat daar in toeriste se voedselvoorkeure voorsien moet word om te verseker dat hulle langer in Oudtshoorn bly en selfs oornag.
"Kos dikteer of ons 'n toeriste-bednag gaan hê of nie."
Volgens Moult is twintig persent van toeriste wat Oudtshoorn in die afgelope drie maande besoek het van die Midde-Ooste, dit is 'n totaal van 6 398 individue wat Oudtshoorn besoek het. "Dit is nog nie eens die Indiese toeriste se toerseisoen nie."
Nuwe restaurant spesialiseer in outentieke Indiese disse
Mault het beklemtoon dat hierdie restaurant, wat onlangs deur Cango Wildlife Ranch geopen is, kan help dat Indiese toeriste langer in Oudtshoorn sal bly. Die restaurant is 100% vegetaries en fokus op die Indiese toeris.
"Gastehuise moet ons kontak indien hulle graag ontbyt aan dié gaste wil voorsien, ons kan hulle by die restaurant akkommodeer. Ons doel is om te verseker dat toeriste soveel moontlik geld in die dorp spandeer," en voeg sy by, "as toeriste tyd in Oudtshoorn spandeer, spandeer hulle ook geld."
Gelukstrekking
Die geld wat met die verkoop van lootjiekaartjies, wat teen R20 ‘n kaartjie beskikbaar was, ingesamel is, sal aangewend word vir die toerismekantoor se bemarking. Verskeie lede en besighede het ongelooflike pryse geskenk.
Bekendstelling van resepteboek, Flavours of the Klein Karoo
Tydens die netwerkaand is die nuwe resepteboek, Flavours of the Klein Karoo ook bekendgestel. Die resepteboek word deur Oudtshoorn- en De Rust-toerismekantoor saamgestel en fokus op disse wat eg Karoo is. Volgens Moult is al die resepte, bydraes van die gemeenskap. Moult het vertel dat die boek 'n passieprojek is en al 'n geruime tyd beplan word. "Dit sal binnekort in kleinhandel winkels, gastehuise en by die toerismekantoor beskikbaar wees." Bestellings vir die boek kan solank by die toerismekantoor geplaas word om te verseker dat daar een in die Kersfeeskous is.
Black Friday Special op seisoenkaartjies
Moult het ook van die geleentheid gebruik gemaak om inwoners daaraan te herinner dat jaarkaartjies op Black Friday teen halfprys beskikbaar sal wees.
Vir meer inligting kan die Cango Wildlife Ranch by 044 272 5593 geskakel word.