Bridgton Senior Sekondêr se 1982-matrieklas hou reünie
Die tweede matriekklas van Bridgton Senior Sekondêr (BSS) het die naweek van 7 tot 9 Oktober hul 40-jaar reünie by hul alma mater gehou.
Die klas van 1982 se twee taalonderwysers, Kiewiet Manuel en Phillip Stalmeester, het die reünie saam met 21 van die oudklasmaats bygewoon. Oudtshoorn se voormalige burgemeester, Colin Sylvester, was in 1982 die skool se hoofseun met Carol Job, die hoofdogter.
Die reünie het die Vrydagaand begin met ‘n kaas-en-wyn funksie en is die volgende oggend voortgesit met ‘n besoek aan die Safari-volstruisplaas. Die reünie is op Sondag 9 Oktober afgesluit met ‘n kerkdiens gelei deur een van die oudleerders, ds. Wilfred Moses.
Tydens Vrydagaand se funksie is ‘n oomblik van stilte gehou vir die 24 klasmaats, van die oorspronklike 186, wat reeds heengegaan het.
Volgens Kiewiet Manuel het sommige onderwysers destyds die Standerd 10F-matriekklas as “berug” beskryf omdat die leerders glo as rumoerig en ongedissiplineerd beskou is en klasse ontwrig het, maar dat hy dit nie so ervaar het nie.
“Ek is vandag baie trots op julle oor wat julle bereik het. Julle het uitgestyg bo soms baie moeilike omstandighede. Dankie vir die van julle wat my nie hoofbrekens besorg het nie en geluister het na my gepreek en geskel. Dankie dat julle vanaand nog is soos die matrikulante wat ek in1982 geken het en nog oor dieselfde aangename persoonlikhede en mooi gesindhede soos destyds beskik. Dankie dat julle nie toegelaat het dat status en posisies julle persoonlikheid verander het nie.”
Manuel het sy oudleerders alles van die beste toegewens vir die toekoms en gevra om hulself en hul kinders te beskerm.
Nog ‘n oudonderwyser, Phillip Stalmeester, het in sy boodskap na die 40 jaar verwys as ‘n getal wat ‘n belangrike getal in die Bybel is soos die 40 jaar wat die Israeliete in die woestyn moes deurbring en die 40 dae van vas.
Bridgton Senior Sekondêr het sy deure in 1976 oopgemaak en die klas van 1982 was die tweede matriekklas van die skool.
Die matriekklas van 1982 beplan volgens een van die organiseerders, Mercia Moses, om weer oor twee jaar bymekaar te kom.