Historiese uitstappie in Klaarstroom
KLAARSTROOM – Die Stigting Simon van der Stel Suid-Kaap en Outeniqua Historical Society het op 29 Oktober ‘n uitstappie na Klaarstroom gereël - die eerste na die pandemie.
‘n Vol maar interessante program het vir 'n praatjie oor die wolwassery, wandel deur die dorp, anekdotes oor die inwoners van destyds, Anglikaanse Kerk en die Boereoorlog, gehandel.
Frans Steenkamp, plaaslike boer van Klaarstroom, het 'n praatjie oor die wolwassery wat in die 19de eeu by die gewese Petersburg opgerig is, gehou.
Allen Duff, van die George Historical Society, het meer oor die Boereoorlog wat na Klaarstroom oorgevloei het vertel en hoe die ekonomie van daardie tyd die ontstaan van Klaarstroom bevorder het.
‘n Brakdak-woning is ook besoek en Duff het verduidelik hoe die tipe dak opgerig is. Jeremy Witts-Hewison, oudonderwyser en sy vrou Sharon bestuur en besit Klaarstroom gastehuis. Jeremy het 'n begeleide wandel deur die strate van Klaarstroom gehou en meer oor die historiese huisies en interessante anekdotes oor die inwoners wat destyds daar gebly het vertel. Die Anglikaanse Kerk wat in Klaarstroom opgerig is het ook deel van sy wandel gevorm.
Koos Roets, bekende filmmaker en inwoner van Klaarstroom, het al heelwat rolprente in Klaarstroom geskied. Hy het ook as deel van die dag lokaliteite uitgewys waar sekere tonele in sy films geskied was. Hy het selfs vertel hoedat hy jare gelede met ‘n vliegtuig in die hoofstraat van Klaarstroom geland het.
Eunice Visser, lewensmaat van Roets is ook versoek om iets oor haar boek,
Die Kaapse Slawe, 1652-1838, ‘n kultuurhistoriese perspektief, te vertel. Die boek word deur Protea Boekhuis uitgegee en is reeds aanlyn en in boekwinkels beskikbaar.
Heerlike verversings en ‘n middagete is deur die Klaarstroom Hotel aangebied of jy kon jou eie eetgoed saamneem om ‘n rustige piekniek te hou.
Roets en Visser vertel dat die dag vir hulle 'n ongelooflike 'eye opener' was omdat hulle onbewus was van die wonderlike ryk historiese geskiedenis van die dorpie Klaarstroom.