ANC spoeg vuur oor Jordaan se MB-aanstelling
KANNALAND - Die onlangse aanstelling van Keith Jordaan as waarnemende munisipale bestuurder het die ANC in Kannaland warm onder die kraag. Jordaan se aanstelling volg nadat Jeffrey Donson verlede maand sonder 'n teenstem weer tot burgemeester verkies is nadat Icosa en Kannaland Independent Party (KIP) 'n koalisie gesluit het en sodoende beheer oor die raad geneem het.
Die ANC, DA en KIP was voorheen in 'n koalisie met Nicky Valentyn (ANC), toe in die burgemeesterstoel, en raadslid Aletta Steenkamp (DA) wat Kannaland op die Tuinroete-distriksraad verteenwoordig het.
Jordaan se aanstelling het die wenkbroue laat lig omdat hy in 2019 weens finansiële wanadministrasie by die Georgemunisipaliteit in verband met ’n belegging van R350 miljoen skuldig bevind en ontslaan is.
Kannaland se ANCtak het by monde van hul woordvoerder, Elvis Ntlebi, op 8 November ’n sterk bewoorde mediaverklaring uitgereik waarin hulle hul self uitspreek teen die aanstelling van Jordaan as waarnemende munisipale bestuurder.
"Ons is teleurgesteld in minister Anton Bredell se weiering om die munisipale raad verantwoordbaar te hou vir die ooglopende onwettige aanstelling van Jordaan. Bredell se besluit in hierdie verband onderstreep die DA provinsiale regering se skynheiligheid as dit by goeie regering kom.
“Ingevolge wetgewing moet Jordaan op 'n swartlys geplaas word en verbied word om by enige munisipaliteit vir 'n tydperk van 10 jaar te werk. Die minister se besluit om die Jordaan-kwessie te ignoreer en onder die mat in te vee is 'n growwe skending van sy (Bredell) se oorsigrol as provinsiale minister van plaaslike regering. Ons doen 'n beroep op Bredell om die oppergesag van die gereg te respekteer en onpartydig sonder vrees op te tree - dit is 'n basiese beginsel wat ten alle koste beskerm moet word. Bredell se skaamtelose politieke speletjies in Kannaland is 'n groot terugslag vir die regering se pogings om amptenare soos Jordaan verantwoordbaar te hou vir finansiële wanadministrasie. Dit is teen hierdie agtergrond dat die ANC in Kannaland daarop aandring dat Bredell onverwyld as provinsiale minister van plaaslike regering moet bedank," lui die verklaring.
Wouter Kriel, woordvoerder van Anton Bredell, het by navraag gesê dat sy departement tans besig is om 'n regsmening van 'n senior advokaat in te win met betrekking tot die aanstelling van Jordaan en dat hy sy bepalings sal maak sodra die regsmening verkry is. In die verklaring erken Bredell ook dat hy bewus is van die R350 miljoen belegging waaraan Jordaan in 2019 skuldig bevind en ontslaan is en dat die saak sy aandag geniet.
"Weens die moontlike implikasies van die SAMWU-uitspraak deur die Konstitusionele Hof oor die relevante bepalings wat herindiensneming van afgedankte personeel reguleer, vereis ek ook tans regsekerheid voordat enige bepalings gemaak kan word. Die ANC se aantygings dat ek die aangeleentheid onder die mat probeer vee is dus ongegrond omdat hulle nie bewus is van die aksies en prosesse wat tans in die agtergrond aan die gang is nie. Dus is die ANC se versoek dat ek onmiddellik moet bedank, ook 'n ongegronde versoek - ek gee uitvoering aan die magte wat in die betrokke wetgewing aan my verleen is."
Simmers ook in spervuur
Cameron Dugmore, ANC-parlementslid, het gister crimen injuria klagtes teen Minister Tertuis Simmers (DA), en teen die aanstelling van Jordaan by Calitzdorppolisiestasie aanhangig gemaak. Die klagtes is gebaseer op WhatsApp-gesprekke waarin Simmers glo vir Steenkamp onder druk geplaas het om Jordaan aan te stel.