Dugmore bevraagteken Macpherson se museum-motiewe
OUDTSHOORN - Die DA Oudtshoornburgemeester, Chris Macpherson, moet ontbloot word vir sy kruistog teen die CP Nel-museum. So het Cameron Dugmore (ANC-parlementslid) Dinsdagoggend tydens sy besoek aan die CP Nel-museum gesê. Dugmore was vergesel van plaaslike raadslede Zoe Tyatya, Sharon van Rooyen, Joey Canary en Dora Moos tesame met ANC-substreeklid, Ellen Prins.
Volgens Dugmore spruit sy besoek uit die feit dat burgemeester Macpherson onlangs 'n regsproses teen die museum begin het wat daarop gemik is om die museumraad te verwyder. Dit alles ondanks die bestaan van 'n huurkontrak tussen die munisipaliteit en die museum vir 'n onbepaalde tydperk, sê Dugmore.
Oor sy besoek het Dugmore gesê: “Ons raadslede het ons ingelig dat die aangeleentheid van die museum nog nooit sedert die nuwe munisipale raad in November 2021 verkies is, bespreek is nie. Daar is tans ernstige vrae oor die agenda en belange van burgemeester Macpherson in die museum. Macpherson het ook sonder 'n mandaat van die munisipale raad, regsdienste verkry. Nog 'n kommerwekkende aspek is die betreding van die museumeiendom deur sekere huurders by die Queens Mall.”
Of sommige van hierdie besighede vir tariewe en dienste betaal, moet ook ondersoek word.
Dugmore sê verder dat dit sy eerste besoek aan die museum was en dat hy bemoedig was deur wat by die museum uitgestal word sowel as die werk wat deur die CP Nel-museumraad gedoen is om te verseker dat 'n inklusiewe geskiedenis van die Groter Oudtshoorn weerspieël word. “Hierdie geskiedenis van groepsgebiedeverwyderings sluit die geforseerde verskuiwings en die anti-apartheidstryd in Oudtshoorn in. Dit is op rekord dat Oudtshoorn die eerste munisipaliteit in Suid-Afrika was wat die groepsgebiedewet geïmplementeer het," het Dugmore benadruk.
Tydens Dugmore se besoek is op die volgende stappe ooreengekom
ANC-raadslede moet versoek dat die kwessie van die museum openlik tydens November se raadsvergadering bespreek word.
Gemeenskapslede moet dit oorweeg om die NROP via die formele petisieproses te nader.
Die leier van die opposisie moet in die gees van samewerkende regering en om 'n oplossing te vind, die nasionale minister van kuns en kultuur, Nathi Mthetwa, versoek om 'n vergadering met LUR Anroux Marais, LUR Bredell, die burgemeester en die Raad van die Museum te belê in 'n poging om 'n oplossing te vind.
Die Openbare Beskermer moet ook versoek word om alle aangeleenthede wat verband hou met die wegdoening van museumgrond te ondersoek, asook die kwessie van watter besighede vir tariewe en dienste betaal en watter nie.
“Ons glo dat die museum 'n groot bate vir die gemeenskap is. Alle gemeenskappe moet ingesluit voel in die geskiedenis wat dit weerspieël. Dit is nie nodig om in 'n uitgerekte en duur regstryd betrokke te raak nie. Kom ons doen die regte ding en vind 'n volhoubare oplossing,” het Dugmore bygevoeg.
Macpherson se reaksie
Die burgemeesterskantoor se media- en kommunikasiebeampte, Hannes Visser, het in 'n verklaring in reaksie op Dugmore se
besoek gesê dat Oudtshoorn 'n soewereine regeringsfeer is en dat die uitvoerende burgemeester nie in sy persoonlike hoedanigheid optree nie, maar as die verkose eerste burger van die dorp om die belange van sy burgers te beskerm.
"Dit is nie die eerste keer dat Dugmore betrokke is in die sfeer van die plaaslike regering in Oudtshoorn nie en wat Dinsdag se besoek werklik bewys, is dat die museumraad 'n politieke agenda het. Ek vind dit ook interessant dat die ANC nou by hierdie dispuut betrokke is. Wat selfs meer interessant is, is dat nie een van my bekommernisse wat ek herhaaldelik oor die museumraad uitgespreek het nie, deur Dugmore aangespreek is nie."
Luidens die verklaring beklemtoon Macpherson die reg om die belange en die regte van 'n dorp se burgers te beskerm wat 'n fundamentele deel van die pligte van die uitvoerende burgemeester en die munisipale bestuurder is.
Macpherson wys ook daarop dat die besigheidsperseel en ontwikkeling van
meer as R80 miljoen nog nooit as deel van die museum beskou is nie.
"Dit is presies waar die museumraad hul gesag oorskry. Dit was nog nooit 'n kwessie vir die totstandkoming van die huidige museumraad nie. Ek vind dit vreemd dat die ANC-raadslede hierdie kwessie wil bespreek terwyl die twee verkose raadslede deur die museumraad geweier is.
“Ek sal 'n forensiese ondersoek na die bestuur van die museum en die jurisdiksie van sy raadslede verwelkom.
“Dit is ook belangrik om te weet dat die inhoud en uitstallings van die museum nog nooit 'n kwessie was nie, maar eerder die manier waarop die direksie die breër gemeenskapsverteenwoordiging op die direksie ontken.
Dan wil ek ook graag tot die gevolgtrekking kom en onder Dugmore se aandag bring dat dit die museumraad was wat die eerste regsgeding aangepak en begin het. Dalk sal 'n forensiese ondersoek lig werp op waar die finansiering vir daardie regsaksies vandaan kom," lui die verklaring.