13 jaar vir verkragting en seksuele aanranding
‘n Man van Dysselsdorp, wat ‘n 17-jarige meisie verkrag en ook seksueel aangerand het toe sy 16 was, is verlede week in die Oudtshoorn-streekhof 13 jaar tronkstraf opgelê.
Jacobus Manuel (29) het die minderjarige in Mei 2021 verkrag en vyf maande later seksueel aangerand.
Manuel het die betrokke dag van die verkragting die klaer gevra om saam te ry toe hy mense met sy motor moes gaan wegbring. Op pad terug het hy stilgehou, haar ’n soentjie gevra en met pepersproei gedreig. Sy het geval toe hy haar die bosse ingetrek het en haar arm is ook beseer.
Hy het haar verkrag en agterna by die huis R10 belowe en ‘n hegpleister op haar arm geplak.
Die klaer het eers vir niemand van die verkragting vertel nie omdat sy gemeen het niemand sal haar glo nie.
Toe Manuel so vyf maande later weer aan haar borste vat en sê dat hy haar nie sal uitlos nie, het sy besluit tot hiertoe en nie verder nie, en na die polisie gegaan.
Streeklanddros Daniel Boks het met vonnisoplegging gesê Manuel was in ‘n vertrouensposisie en moes van beter geweet het.
Verder was dit ook skokkend dat hy ‘n volwasse vrou, Elsie Ruiters, geroep het om vir hom te kom getuig en gesê het dit kon nie gebeur het nie.
“Die getuie was duidelik daarop uit om die beskuldigde, wat aanvanklik onskuldig gepleit het, te beskerm. Die beskuldigde se familie het ook die klaer blameer en dit is wat daar buite in die gemeenskap aangaan,” het Boks gesê.
Manuel is tot 10 jaar vir verkragting en drie jaar vir seksuele aanranding gevonnis. Sy naam sal ook in die nasionale register vir seksoortreders opgeneem word.