Vierjarige verdrink in waterkanaal

'n 4-jarige seun van Bongolethu het Saterdag 19 November omstreeks 13:35 in die sementkanaal naby Black Joint, Bongolethu geval en waarskynlik verdrink. Volgens Suid-Kaapse polisiewoordvoerder, lt.kol. Malcolm Pojie, het Christopher Solomons saam met 'n vriend gespeel toe hy in die sementkanaal geval het.

Die kanaal bestaan uit gedeeltes sement en grond en strek oor 'n afstand van 135 km om water aan verskeie plase op die netwerk te verskaf.

Pojie vertel dat weens die steil wand van die kanaal kon Solomons nie daarin slaag om uit te klim nie. Noodpersoneel het sy liggaam naby die brug by die N12 gevind. Die liggaam is aan forensiese patologie oorhandig wat 'n nadoodse ondersoek sal doen om die oorsaak van dood te bepaal.

'n Dossier vir ’n geregtelike doodsondersoek is geopen.

Stompdrift-Kamanassie Watergebruikersvereniging

Willem Fourie, bestuurder van SKWGV vertel dat daar voorkomend opgetree is deur kennisgewings aan die media te stuur en op Facebook te plaas, kennisgewingpamflette in Dysselsdorpomgewing te versprei asook die patrollering van die waterkanale in die Dysselsdorpomgewing.

SKWGV rig 'n versoek dat niemand die sementkanaal betree of daar inklim nie, al is dit droog. "Kinders moet onder geen omstandighede in die kanaal klim nie. Ouers moet asseblief seker maak dat hulle kinders weet dat die kanaal gevaarlik," waarsku Fourie.

Fourie vertel dat hy voortaan ook die samewerking van Christo Nel, stasiebestuur van Heartbeat FM gekry het om die kennisgewing aan luisteraars oor te dra.