Herstrukturering teen einde van die jaar klaar

- “Ek wil ons gemeenskap bedank vir hulle begrip en toenemende positiwiteit. Deur hierdie vennootskap tussen inwoners en die munisipaliteit kan ons daarin slaag om Oudtshoorn weer tot 'n modeldorp te herstel.” So het burgemeester, Chris Macpherson die week gesê.

'n Nuwe personeelstruktuur (organogram) is deur 'n herstruktureringspesialis in die weke voor die Oudtshoorn-munisipaliteit se begrotingsvergadering van Mei 2022 opgestel. Die regerende koalisie op daardie stadium het geweier om die begroting te aanvaar tensy die nuwe personeelstruktuur wat deur die spesialis opgestel is, goedgekeur word.

Die raad het toe 'n plasingsbeleid goedgekeur om te verseker dat alle werknemers deel aan die proses het om vanaf die ou personeelstruktuur (organogram) na die nuwe een oorgeplaas te word.

In 'n gesprek met Chris Macpherson, burgemeester van die Oudtshoornmunisipaliteit vertel hy dat die munisipale personeel sedertdien vanaf 1 242 tot net minder as 800 verminder het. "Hierdie proses het tot gevolg dat daar tans 'n hele aantal poste is wat nie gevul kan word voordat die plasingsproses teen die einde van die jaar afgehandel is nie."

Nadat die plasingsproses afgehandel is sal alle vakante poste waarvoor begroot is, geadverteer en gevul word.

Macpherson vertel dat die herstruktureringsproses druk op munisipale personeel plaas en dat dit 'n invloed op dienslewering het.

Hy is wel positief dat wanneer vakante poste gevul word, dienslewering drasties sal verbeter.

Macpherson, spreek ook sy dank en waardering uit teenoor werknemers vir hulle positiewe benadering tot die herstruktureringsproses.