Man lank tronk toe na verkragting van vrou
- ‘n Man van Bongolethu, Oudtshoorn, wat ‘n vrou herhaaldelik verkrag het is Vrydag in die Oudtshoorn-streekhof
30 jaar gevangenisstraf opgelê.
Herbert Stuurman (36) is daaraan skuldig bevind dat hy die vrou verskeie kere verkrag het.
Die klaer (22) het getuig dat Stuurman haar telkemale verkrag het wanneer hy dronk was. Hy het haar mond toegedruk en met die dood gedreig sou sy vir enigiemand daarvan vertel het.
Sy het aanvanklik die verkragting by haar oupa aangemeld wat die beskuldigde na ‘n sangoma geneem het, maar niks verder gebeur het nie. Sy het later besluit om die verkragting by die polisie aan te meld.
Streeklanddros Daniel Boks het bevind dat die staat sy saak bo redelike twyfel bewys het. Stuurman het alles ontken terwyl die vrou ’n geloofwaardige getuie was.
Die staatsaanklaer, Elaine Plaatjies, het die hof vir lewenslange gevangenisstraf gevra omdat dit die enigste gepaste vonnis vir Stuurman se optrede sal wees. Hy toon ook geen berou nie.
Die landdros het met vonnisoplegging gesê Stuurman is skuldig bevind aan ‘n misdryf wat meer as alle ander misdrywe gepleeg word en dat die hof ‘n boodskap moet uitstuur dat dit nie geduld kan word nie.
Volgens die landdros skrik oortreders nie eers meer vir die voorgeskrewe minimum vonnisse nie en verkragters moet so gestraf moet word dat die gemeenskap nie die reg in eie hande neem nie.
Die hof het Stuurman tot 30 jaar tronkstraf gevonnis en ook gelas dat sy naam in die nasionale register vir seksoortreders opgeneem word. Hy is ook onbevoeg verklaar om ‘n vuurwapen te besit.