Herprogrammering van voorafbetaalde elektrisiteitmeters in die pyplyn
OUDTSHOORN - Die Groter Oudtshoorn-munisipaliteit (Oudtshoorn, De Rust en Dysselsdorp) is besig met 'n opgraderingsproses om die voorafbetaalde elektrisiteitsmeters by wonings te herprogrammeer.
Dit beteken dat 'n munisipale veldwerker ‘n besigheid of woning sal besoek en 'n kode in die bestaande kragmeter sal insleutel. Die kode sal die bestaande kragmeter (STS) herprogrammeer en inwoners kan dan soos gewoonlik voortgaan om krag te koop en in te sleutel. Die geherprogrammeerde kragmeter sal dan as 'n TID-kragmeter bekendstaan.
Alle munisipaliteite is verplig om die proses teen 24 November 2024 te voltooi. Indien 'n woning of besigheid nie hierdie opgradering (herprogrammering) aanbring nie, sal die STS-kragmeter ophou werk en sal die verbruiker nie in staat wees om elektrisiteit aan te koop of in te pons nie.
Waarom vind hierdie herprogrammering plaas?
Hierdie herprogrammering is om munisipaliteite te help om seker te maak dat alle voorafbetaalde kragmeters op standaard is en te verseker dat munisipaliteite se rekords van verbruikers op datum gebring word.
Sleutel alle voorafbetaalde kragkodes in voor die herprogrammering plaasvind. Inwoners word aangemoedig om alle uitstaande voorafbetaalde elektrisiteitkodes in die STS-kragmeters ("ou") in te sleutel voor die herprogrammering. Geen
voorafbetaalde kragkodes van die STSkragboks ("ou") sal uitbetaal word nie. Dit beteken dat voorafbetaalde kragkodes wat nog nie gebruik is nie voor die opgradering ingesleutel moet word sodat u nie die eenhede verloor nie.
Munisipale veldwerkers
Besigheidseienaars en inwoners word versoek om hulle volle samewerking te gee wanneer veldwerkers wonings en besighede besoek. Die volgende kan as identifikasie gevra word wanneer 'n veldwerker u besoek.
'n oorsponklike getekende instuksiebrief van die munisipaliteit
'n identifiseringskaart en 'n identifikasie dokument
Basiese persoonlike vrae sal ook beantwoord moet word om die munisipaliteit se databasis op datum te bring.
Munisipale-veldwerkers sal areas volgens onderstaande skedule besoek:
1. De Rust - November 2022
2. Dysselsdorp - November 2022 Maart 2023
3. Rosevalley - Maart 2023 - May 2023
4. Bongolethu - May 2023 - Augustus 2023
5. Bridgton - September 2023 Februarie 2024
6. Toekomsrus - Maart 2024
7. Oudtshoorn - April 2024 - Oktober 2024
8. Bergoord - November 2024
Vir enige navrae rakende die nuwe TID-kragmeterskode proses kan Nondumiso Mjewu by 044 203 3092 of Portia Sazela by 044 203 3058 geskakel word.