Titans oordonder Convent Bulldogs
Die Oudtshoorn Titans-vlakkiekrieketspan het verlede Sondag vir Convent Bulldogs van George met 155 lopies geklop.
Titans se drag word deur Dryland Event Management geborg en die dag is deur die nie-winsgewende organisasie, Sport Buddy, aangebied. Die Bulldogs is tans die beste vlakkiekrieketspan in George nadat hulle verlede maand as die plaaslike kampioene gekroon is.
In die Bulldogs se wedstryd teen die Titans het dit omtrent sesse en viere gereën met die tuisspan wat 'n massiewe 230 lopies in hul toegepaste 20 boulbeurte gemoker het. Dit was veral Tyrese Karelse wat die oog gevang het met sy warrelwindbeurt van 112 lopies.
Sy beurt het 'n allemintige 12 reusesesse en vier viere ingesluit. Hy was briljant ondersteun deur Willem ‘Wêza’ Goliath wat met 94 lopies, slegs ses lopies vir sy honderdtal gekort het.
Bulldogs is daarna uitgehaal vir 75 lopies wat aan die Titans 'n oorwinning van 155 lopies besorg het. Jason Japper was die Titans se beste bouler met 'n boulontleding van 4/9.
In die voorwedstryd het Oudtshoorn Barbarians 166 lopies op die telbord geplaas.
Met die kolf het die Barbarians se kapt. Marco Jansen (43), Ruaan Fielies (32) en Damion Esau (43) met die kolf uitgeblink. Conville het geen antwoord vir Barbarians se boulaanval gehad nie met Goliath wat hierdie keer sy vernuf met bal in hand ten toon gestel het deur sewe paaltjies plat te trek om die besoekers vir 57 lopies uit te haal. Barbarians wen dus met 109 lopies.
Die Titans beoog om vroeg volgende jaar in George te gaan meeding waarna 'n toer na Paarl en Robertson ook sal plaasvind. Voornemende borge kan 084 025 6698 skakel of WhatsApp.