Raadslede sê nee vir salarisverhoging
Die Oudtshoorn munisipale raad het verlede Woensdag tydens 'n raadsvergadering eenparig besluit om nie die nasionale regering se aanbevelings van 'n 3,8% salarisverhoging te aanvaar nie.
Die bespreking in die raadsaal het gesentreer rondom die Wet op Vergoeding van Openbare Ampsdraers, 1998, wat spesifiek gefokus het op die bepaling van boonste salarisperke vir raadslede, soos uiteengesit in die Staatskoerant No. 49142 gedateer 18 Augustus 2023.
Die graderingsproses om die persentasieverhoging vir elke munisipaliteit in SuidAfrika te bereken, word bepaal deur die totale bruto munisipale inkomste tesame met die grote van die bevolking per munisipaliteit.
Op grond van hierdie faktore en berekeninge word die Oudtshoornmunisipaliteit as vlak-3 gegradeer wat die volgende verhogings te weeg sou gebring het:
Salaris-pakkette
Burgemeester, R886 685 na R920 379 (R33 649 -verskil) Onderburgemeester, R709 349 na 736 304 (R 26 995 - verskil )
Speaker, R709 349 na R736 304
(R 26 995 -verskil )
Lede van die burgemeesterskomitee, R665 015 na R690 286 (R25 271 - verskil) Ander deeltydse raadslede, R280 603 na R291 266 ( R10 663 -verskil) Section 79 deeltyds, R360 107 na R373 791 (R13 684 -verskil)
Die selfoontoelae van alle raadslede verander van R3 400 na R3 600.
Terugwerkende verhoging betalings
Indien die munisipale raadslede ingestem het vir die aanvaarding van hierdie aanbevole verhogings, sou die totaal daarvan terugwerkend gewees het vanaf 1 Junie 2023. Munisipale raad stem eenparig teen voorgestelde nasionale verhoging
Luidens 'n verklaring van die munisipaliteit weerspieël die munisipale raadslede se teenkanting van die voorgestelde salarisverhoging hul verbintenis tot verantwoordelike fiskale bestuur.
"Die raadslede het ook besluite geneem om hul teenkanting van die verhogings aan Anton Bredell, die LUR van plaaslike regering, omgewingsake en ontwikkelingsbeplanning, te kommunikeer. Hierdie besluit stuur 'n duidelike boodskap dat die raad die belange van die gemeenskap eerste stel.
Die raad het egter die "tools of trade" en kapasiteitsbou/opleidingsbepalings wat in die Staatskoerant uiteengesit is, aanvaar. Dit is 'n strategiese stap om te verseker dat raadslede goed toegerus is om die gemeenskap doeltreffend te dien. Die Groter Oudtshoorn Munisipaliteit het hul verantwoordelikheid ernstig opgeneem en 'n deeglike oorsig van die implikasies gedoen voordat hul besluit geneem is. Die Groter Oudtshoorn Munisipaliteit is onwrikbaar in sy verbintenis tot begrotingsverantwoordelikheid en om die finansiële volhoubaarheid van die munisipaliteit te verseker," lui die verklaring.