Nuwe verpleegsters by Millenium Park-aftreeoord
Millenium Park-aftreeoord in Oudtshoorn het verlede week twee nuwe verpleegsusters, wat by die versorgingseenheid aangestel is, verwelkom.
Sr. Lizette van der Westhuizen met jare se ervaring as ‘n verpleegsuster, is as bestuurder van die versorgingseenheid aangestel. Sy was onder meer in bevel van die Kango-kliniek en het ook lank in Dubai gewerk.
Sy het ervaring in staats mediese dienste, sowel as die privaat mediese sektor. As nuwe hoof van die versorgingseenheid sê Van der Westhuizen dat pasiëntesorg vir haar van kardinale belang is. “Ons fokus op ons pasiënte. Hulle gesondheid en welstand is vir ons die belangrikste.”
Sr. Zenobia Jacobs wat as kliniese suster aangestel is kom ook met dieselfde ervaring en was onder meer werksaam in Engeland en Saudi Arabië by aftreeoorde. Sy was, voordat sy by Millenium Park aangesluit het vir 12 jaar verbonde aan ‘n privaat hospitaal as suster in die intensiewesorgeenheid.
Verder het die Trusteeraad ook twee vakante assistentverpleegster poste gevul wat sal sorg dat die nag- en dagsorg van die pasiënte op ‘n deurlopende basis van hoogstaande gehalte is.
Frik Geyser, wat op die Trusteeraad dien het gesê dat die aanstelling van die nuwe verpleegpersoneel deel is van die opheffingsprogram van die versorgingseenheid.
“Millenium Park se inwoners sal in die nabye toekoms ‘n wesenlike verskil aan dienslewering van die eenheid ervaar. Die Trusteeraad streef daarna dat Millenium Park se inwoners en pasiënte trots moet wees op die versorgingseenheid en ook sien dat ons die beste gehalte pasiëntesorg lewer.”