Cango Wildlife Ranch help aasvoël red
'n Gesamentlike inisiatief tussen VulPro, CapeNature en Cango Wildlife Ranch het verlede week gelei tot die suksesvolle rehabilitasie en vrylating van 'n Kaapse aasvoël.
VulPro, gebaseer op die buitewyke van Hartebeespoortdam in die Noordwes-provinsie, is 'n gespesialiseerde aasvoëlbewaringsorganisasie wat spesialis-rehabilitasie van aasvoëls onderneem.
Tammy Moult, toerismebestuurder van Cango Wildlife Ranch, vertel iemand het op 31 Julie die aasvoël, wat met sy vlerk aan 'n telefoonpaal vasgesit het, gesien. "Die beseerde aasvoël het op die grond geval en tussen VulPro en CapeNature is ’n span uitgestuur om die voël te red. Die voël is na die Oakhurst-dierekliniek in Swellendam geneem, waar X-strale geneem is en vloeistof, wondbehandeling en antibiotika gegee is. Op VulPro se versoek is Cango Wildlife Ranch vir hulp genader en is die voël gaan haal."
Die span van Cango Wildlife Ranch het, met die hulp van hul veearts by Oudtshoorn Dierekliniek, nog 'n deeglike ondersoek laat doen. "Gelukkig het die voël geen frakture opgedoen nie, en met die nodige medikasie het die span teruggekeer na die fasiliteit waar die aasvoël in hul sorgsentrum op die perseel gehuisves is.
“Die aasvoël is saam met 'n ander aasvoël gehuisves wat ook daar was vir rehabilitasie. Hulle is sosiale diere en het interaksie geweldig nodig wat met die herstelproses help.”
Dit het 'n paar dae geneem voordat die aasvoël weer krag gekry het. Albei voëls se genesingsreise het saam verloop en die voëls is saam na 'n buitelugvolière op hul privaat reservaat geskuif.
VulPro het 'n verteenwoordiger na Cango Wildlife Ranch gestuur om 'n mikroskyfie op die voël te plaas, en terselfdertyd is planne vir die vrylating uitgevoer.
Die voël is op 4 September na die Potteberg-gasteplaas, langs die De Hoop- natuurreservaat, naby Bredasdorp geneem - die tuiste van die enigste bekende aasvoëlkolonie in die Wes-Kaap en is daar vrygelaat.
"Hierdie ongelooflike suksesverhaal is moontlik gemaak deur die samewerking en
sorg van alle betrokke partye; van die eienaar van Potteberg-gasteplaas, tot die wonderlike personeel by De Hoop-natuurreservaat, die publiek wat ons in kennis gestel het van die lot van die voël, die pogings van CapeNature, VulPro en hul voorste kundigheid, die veeartse wat gehelp het, en Cango Wildlife Ranch vir behuising en versorging," sê Moult.